މީހެއްގެ އެކައުންޓުން އެމީހަކަށް ނޭނގި 1.8 މިލިއަން ރުފިޔާ ނަގައި، ސްކޭމް ހިންގި މީހާއަށް ދިނީ މާ ކުޑަ އަދަބެއް ކަމަށް މަތިވެރީ ދާއިރާގެ މެންބަރު ޙަސަން ޒަރީރު ވިދާޅުވެއްޖެއެވެ.
ރާއްޖޭގައި އިންތިހާއަށް ސްކޭމްގެ ކަންތައް އިތުރުވަމުން އަންނާތީ އެކަމާ ކަންބޮޑުވުން ފާޅުކޮށް ޒަރީރު ވިދާޅުވީ 1.8 މިލިޔަން ރުފިޔާގެ ސްކޭމް ހިންގި މީހާގެ މައްޗަށް ޕީޖީން ދައުވާކޮށްފައިވަނީ ކޮން ހަމަތަކެއްގެ މަތިން ކަމެއް ސާފު ނުވާ ކަމަށާއި ކުރިމިނަލް ކޯޓުން އޭނާގެ މައްޗަށް (އެހާ ބޮޑު އަދަދަކަށް ސްކޭމް ހިންގި މީހަކު) އަދަބެއްގެ ގޮތުން 115،400 ރުފިޔާ ޖޫރިމަނާގެ ގޮތުގައި ދެއްކުމަށާއި އެއް އަހަރާއި ހަތް މަހާއި ހަ ދުވަހަށް ޖަލަށް ލުމަށް ހުކުމް ކުރުމުން އެކަމާ ސުވާލު އުފެދޭ ކަމަށެވެ. އަދި އެ ދިނީ މާ ކުޑަ އަދަބެއް ކަމަށް އޭނާ ވަނީ ވިދާޅުވެފައެވެ.
“މިފަދަ ބޮޑު ޖަރީމާއެއް ހިންގި މީހަކަށް މިފަދަ ލުއި އަދަބެއް ދިނީމާ މި މައްސަލަތައް ޙައްލު ކުރަން އެބަ އުނދަގޫވޭ.” ޒަރީރު ވިދާޅުވިއެވެ.
ޒަރީރު މިހެން ވިދާޅުވީ ސްކޭމްގެ މައްސަލަތަކުގައި ތިންވަނަ ފަރާތުގެ އެކައުންޓްގައި ހުންނަ ފައިސާ ހިފަހައްޓަން ފުލުހުންނަށް އަމުރު ނެރެވޭ ގޮތަށް ޖިނާއީ އިޖުރާޢަތުގެ ޤާނޫނަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ހުށަހަޅާފައިވާ އިސްލާހުގެ ބަހުސްގައެވެ.
ޒަރީރު ވިދާޅުވީ މިފަދަ ބޮޑެތި ވައްކަމުގެ މައްސަލަތަކުގައި މިކަހަލަ ލުއި އަދަބެއް ދިނުމުން ޢަދުލު އިންސާފުގެ ނިޒާމާމެދު ރައްޔިތުންގެ އިތުބާރު ކުޑަވާ ކަމަށެވެ. އެހެންކަމުން މިއީ ޤާނޫނުގައި ހުރި މައްސަލައެއްތޯ ނުވަތަ ފަނޑިޔާރަށް އޮންނަ އިޚްތިޔާރުގެ ސަބަބުން މެދުވެރިވާ ކަމެއްތޯ ބަލަންޖެހޭ ކަމަށް އޭނާ ވަނީ ގޮވާލާފައެވެ.
ކާފަގެ އެކައުންޓުން ކާފައަށް ނޭގި 16 އަހަރުގެ ކުޑަކުއްޖަކު ވަނީ ހަސަން ނާހިދާއި އޭނާގެ އޭރުގެ އަންހެނުން މަރްޔަމް ޝަންމާގެ ނަމުގައި އެމްއައިބީގައި ހުޅުވާފައިވާ އެކައުންޓުތަކަށް ޖުމްލަ 1.8 މިލިޔަން ރުފިޔާ ފޮނުވާފައެވެ. އަދި އެ ފައިސާއިން ނާހިދު ވަނީ މުއާމަލާތްވެސް ކޮށްފައެވެ.
އޭގެތެރެއިން 1.6 މިލިޔަން ރުފިޔާ ފުލުހުން ވަނީ ހޯދާފައެވެ.
މި ކުށުގެ އަދަބެއްގެ ގޮތުގައި ހަސަން ނާހިދުގެ މައްޗަށް ވަނީ 115،400 ރުފިޔާ ޖޫރިމަނާގެ ގޮތުގައި ދެއްކުމަށް ހުކުމްކޮށްފައެވެ. ނަމަވެސް ޖިނާއީ އިޖުރާއަތުގެ ގާނޫނުގެ 186ވަނަ މާއްދާއަށް ރިއާޔަތްކޮށް މައްސަލައިގައި ބަންދުގައި ހޭދަކުރި މުއްދަތު ޖަލު އަދަބުން އުނިކޮށް، ދައްކަން ޖެހޭ ޖޫރިމަނާގެ އަދަދު ވަނީ 113،800 ރުފިޔާއަށް ދަށްކޮށްފައެވެ.
ކޮމެންޓް