ޖުޑީޝަރީ ކޮމެޓީން ރަނގަޅު މަސައްކަތެއް! ޓެކްސް އެޕީލް ޓްރައިބިއުނަލުން 4 މެމްބަރުން ވަކިކުރުމަށް ރައީސް އަށް ލަފާދީފި!

ޓެކްސް އެޕީލް ޓްރައިބިއުނަލާ ގުޅޭގޮތުން ހުށަހަޅާފައިވާ މައްސަލަ ރައްޔިތުންގެ މަޖިލީހުގެ ޖުޑީޝަރީ ކޮމެޓީން ދިރާސާކޮށް ނިންމިގޮތުގެ ރިޕޯޓް މަޖިލިސް ތަޅުމަށް ހުށަހަޅައިފިއެވެ.

މި ރިޕޯޓް ހުށަހަޅުއްވައިދެއްވީ ޖުޑީޝަރީ ކޮމެޓީގެ މުޣައްރިރު އަދި މަނަދޫ ދާއިރާގެ މެމްބަރު ޙުސްނީ މުބާރިކްއެވެ.

މި މައްސަލަ ބެލުމަށްޓަކައި ކޮމެޓީގެ 7 ބައްދަލުވުމެއް ބާއްވާފައިވާނެ ކަމަށާއި، ކޮމެޓީގެ ފަރާތުން ޓެކްސް އެޕީލް ޓްރައިބިއުނަލަށް ޒިޔާރަތްކޮށްފައިވާނެ ކަމަށް ޖުޑީޝަރީ ކޮމެޓީގެ މުޣައްރިރުގެ ޙައިޞިއްޔަތުން ޙުސްނީ ފާހަގަ ކުރެއްވިއެވެ

އަދި ސާފުކުރަން ޖެހޭ މަޢުލޫމާތު ސާފުކުރުމަށް އެ ފަރާތްތައް ޖުޑީޝަރީ ކޮމެޓީއަށް ހާޞިރުކޮށް ސުވާލުވެސް ކޮށްފައިވާނެކަންވެސް ޙުސްނީ ވިދާޅުވިއެވެ.

ކޮމެޓީއަށް ފާހަގަ ކުރެވުނު ކަންކަން:

ކޮރަޕްޝަންގެ ތުޙުމަތު ކުރެވޭ ކަންކަން.

ދަޢުލަތުގެ ޚަރަދު ކުޑަކޮށް ކުރެވެން ހުރި ކަންކަން އެ މަގުން ނުކޮށް ހުރިކަން.

ޓެކްސް އެޕީލް ޓްރައިބިނުނަލްގެ އެތެރޭގެ ހިންގުމުގައި ފާހަގަ ކުރެވޭ ކަންކަން.

މީގެ އިތުރުން ޙުސްނީ ވިދާޅުވީ ޓެކްސް އެޕީލް ޓްރައިބިއުނަލަށް ހުށަހެޅޭ މައްސަލަތައް ބަލާ ބެންޗް ކަނޑައެޅުމުގައި މެމްބަރުންގެ މެދުގައި ހަމަހަމަކަން ނެތްކަން ފާހަގަ ކުރެވިފައިވާ ކަމަށާއި، ބެންޗް ކަނޑައެޅުމުގައި މިހާރު ޢަމަލުކުރަމުންދާ އުޞޫލާމެދު ސުވާލު އުފެއްދުމުގެ ޖާގަ އެބަ އޮތް ކަމަށެވެ.

މިހާތަނަށް ހުށަހެޅުނު މައްސަލަތަކުގައި އެއްވެސް ރަޢުޔެއް ލިޔުއްވާފައިނުވާ މެމްބަރަކުވެސް ޓެކްސް އެޕީލް ޓްރައިބިއުނަލްގައި ހިމެނޭކަން ޙުސްނީ ވަނީ ފާހަގަ ކުރައްވާފައެވެ. އަދި މައްސަލަ ބަލާ ބެންޗުގެ ރިޔާސަތު ކަނޑައެޅުމުގައި މިހާރު ޢަމަލުކުރަމުންދާ އުޞޫލުވެސް ރަނގަޅު ނޫން ކަމަށް ޖުޑީޝަރީ ކޮމެޓީއަށް ފާހަގަ ކުރެވިފައިވާ ކަމަށް ޙުސްނީ ވިދާޅުވިއެވެ.

މީގެ އިތުރުން، ޓެކްސް އެޕީލް ޓްރައިބިއުނަލްގެ ރައީސް ކަމުގައި ހުންނެވި މުޙައްމަދު މުނައްވަރު ޢަލީއާއި، ނައިބު ރައީސްގެ މަޤާމުގައި ހުންނެވި ޙުސައިން ޒަައިދާން ޖަލީލާއި، މެމްބަރެއްގެ ގޮތުގައި ހުންނެވި އަޙުމަދު އަޝްރަޤު އަދި ޚަދީޖާ ނަޢީމް ޓްރައިބިއުނަލްގެ މެމްބަރު ކަމުން ވަކިކުރުމަށް ރައީސް އަށް ލަފާ އެރުވުމަށްވެސް ކޮމެޓީން ވަނީ ނިންމާފައިކަމަށް ޙުސްނީ ވިދާޅުވިއެވެ.