ޣައްޒާ ހަނގުރާމައާ ބެހޭގޮތުން ސަޢޫދީ ޚާރިޖީ ވަޒީރާއި ބްލިންކެން މަޝްވަރާކުރައްވައިފި

ސައުދީ އަރަބިއްޔާގެ ޚާރިޖީ ވުޒާރާއިން ބުނީ ޣައްޒާގައި ހިނގަމުންދާ ހަނގުރާމަ ނިމުމަކަށް ގެނައުމަށާއި ސޫދާނާއި ޔަމަނުގައި ހިނގަމުންދާ ކަންކަން ނިމުމަކަށް ގެނައުމަށް، އެމެރިކާގެ ޚާރިޖީ ވަޒީރު އެންޓަނީ ބްލިންކެން އާއި ސައުދީ ޚާރިޖީ ވަޒީރު މިޔަ އާދީއްތަ ދުވަހު ފޯނުން ގުޅުއްވައި މަޝްވަރާ ކުރެއްވި ކަމަށް ސައުދީ އަރަބިއްޔާގެ ޚާރިޖީ ވުޒާރާއިން ވަނީ ބުނެފައެވެ.

ޕްރިންސް ފައިސަލް ބިން ފަރްހާން އާއި އެމެރިކާގެ އެންމެ އިސް ޑިޕްލޮމެޓާ ދެމެދު މަޝްވަރާކޮށްފައި މިވަނީ ޣައްޒާގެ ހަމަނުޖެހުންތަކުގައި ބައިވެރިވާ ފަރާތްތައް ހަނގުރާމަ ހުއްޓާލުމުގެ އެއްބަސްވުމަކަށް ގެނައުމަށް ބާރުއެޅުމުގެ ގޮތުން މެދުއިރުމަތީގެ ދަތުރުފުޅެއްގައި ބްލިންކެން އާދީއްތަ ދުވަހު އިސްރާއީލަށް ވަޑައިގެންފައިވާ ދަނޑިވަޅެއްގައެވެ.

އެމެރިކާގެ ޚާރިޖީ ވުޒާރާގެ އިސް އޮފިޝަލަކު ވިދާޅުވީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އިތުރުން އެގައުމުގެ އިސް އޮފިޝަލުންނާ ހޯމަ ދުވަހު ބްލިންކެން ބައްދަލުކުރައްވާނެ ކަމަށެވެ.

އިސްރާއީލަށް ކުރެއްވި ދަތުރުފުޅަށްފަހު ބްލިންކެން ދެން ވަޑައިގަންނަވާނީ މިސްރަށްކަމަށް ރިޕޯޓްތައް ބުނެއެވެ.