ފެނަކަ ކޯޕަރޭޝަންގެ ބެލުމުގެ ދަށުގައިވާ އައިސް ޕްލާންޓްތައް މިފްކޯއާ ހަވާލުކުރެވެންދެން މަސްވެރިންނަށް މެދުނުކެނޑި އައިސް ފޯރުކޮށްދޭނެ ކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދު ވިދާޅުވެއްޖެއެވެ.
މިކަން ހާމަކޮށްފައިވަނީ އައިސް ޕްލާންޓްތައް މިފްކޯގެ ދަށަށް ބަދަލުކުރުމުގެ މަރުހަލާގެ އިންތިޒާމްތައް ހަމަޖެއްސުމާ ގުޅޭގޮތުން މަސްވެރިކަމާބެހޭ ވަޒީރު އަޙްމަދު ޝިޔާމާއި، ފެނަކަ ކޯޕަރޭޝަންގެ އިސްވެރިންނާއެކު ބޭއްވި ބައްދަލުވުމެއްގައެވެ.
ފެނަކައިން އައިސް ޕްލާންޓްތައް ހިންގުން ހުއްޓާލަން ނިންމާފައިވަނީ އެއީ ކުންފުނީގެ އަމާޒުން ބޭރު، ޚަރަދު ބޮޑު މަސައްކަތެއް ކަމަށް ބުނެއެވެ. މުޢާޒު ވިދާޅުވިގޮތުގައި މި ޚިދުމަތް ދިނުމުން ކުންފުންޏަށް މަހަކު 12 މިލިއަނަށްވުރެ ގިނަ ރުފިޔާގެ ގެއްލުން ވެއެވެ.
ފެނަކައިން މިހާތަނަށް 25 ރަށެއްގައި އައިސް ޕްލާންޓް ހިންގަމުން ދިޔައެވެ. މީގެތެރޭގައި ރަނގަޅަށް ޚިދުމަތް ނުދޭ ޕްލާންޓްތައްވެސް ހިމެނެއެވެ. ނަމަވެސް ކުންފުނިން މުވައްޒަފުންގެ ޚަރަދާއި އޮޕަރޭޝަނަލް ޚަރަދުތަކަށް ބޮޑު ހޭދައެއް ކުރަމުން ގެންދެއެވެ.
ފެނަކައިގެ ޚަރަދު ކުޑަކުރުމަށް ގިނަ ފިޔަވަޅުތަކެއް އަޅަމުންދާއިރު، އެ ކުންފުނީގެ އަމާޒަކީ 2027 ވަނަ އަހަރު ނިމުމުގެ ކުރިން ދަރަނިތައް ޚަލާސްކޮށް ފައިދާ ނެރެވޭނެ ކުންފުންޏަކަށް ހެދުމެވެ.
ކޮމެންޓް