ޕޮޗެޓީނޯ، އެމެރިކާގެ ފުޓްބޯޅަ ޓީމާ ހަވާލުވާން އެއްބަސްވެއްޖެ

އެމެރިކާގެ ޤައުމީ ފުޓްބޯޅަ ޓީމުގެ ހުސްވެފައިވާ ކޯޗުގެ މަޤާމާ ހަވާލުވުމަށް ޗެލްސީގެ ކުރީގެ ކޯޗު، މައުރީސިއޯ ޕޮޗެޓީނޯ އެއްބަސްވެފައިވާ ކަމަށް އެންމެ ފަހުގެ މީޑިއާ ރިޕޯޓުތަކުން ހާމަކޮށްފިއެވެ.

އެމެރިކާއިން އައު މުރައްބީއެއް ހޯދުމުގެ މަސައްކަތް ފެށީ ކޮޕާ އެމެރިކާގެ ގްރޫޕް ސްޓޭޖުގައި ލިބުނު ނާކާމިޔާބީއާ ގުޅިގެން، ޤައުމީ ޓީމުގެ މުރައްބީގެ މަޤާމުން ގްރެގް ބާހޯލްޓާ ވަކިކުރުމާ އެކުގައެވެ.

މީޑިއާ ރިޕޯޓުތަކުގައި ފާހަގަކޮށްފައިވާ ގޮތުގައި، މިދިޔަ މެއި މަހު ޗެލްސީގެ މުރައްބީގެ މަޤާމުން ވަކިވުމަށްފަހު އެއްވެސް ޓީމަކާ ހަވާލުނުވެ ހުރި 52 އަހަރުގެ ޕޮޗެޓީނޯއާއެކު އެމެރިކާގެ އަމާޒަކީ 2026 ވަނަ އަހަރު އެމެރިކާ، މެކްސިކޯ އަދި ކެނެޑާ ގުޅިގެން ބާއްވާ ފީފާ ވޯލްޑް ކަޕަށް އެމެރިކާގެ ޓީމު އެންމެ އެދެވޭ ގޮތުގައި ތައްޔާރުކުރުމެވެ.

ޕޮޗެޓީނޯގެ އިރުޝާދުގެ ދަށުން އެމެރިކާގެ ޤައުމީ ޓީމުން އެންމެ ފުރަތަމަ ކުޅުމަށް ހަމަޖެހިފައިވަނީ ކުރިއަށް އޮތް ސެޕްޓެންބަރު މަހުގެ 7 ވަނަ ދުވަހު ކެންސަސް ސިޓީގައި ކެނެޑާއާ ދެކޮޅަށް ކުޅޭ މެޗެވެ.

ޕޮޗެޓީނޯ ޗެލްސީއާ ގުޅުނީ 2023-24 ވަނަ އަހަރުގެ ސީޒަނުގެ ކުރިން، އިންޓަރިމް މުރައްބީ ފްރޭންކް ލަމްޕާޑުގެ ބަދަލުގައެވެ. މީގެ ކުރީ ސީޒަނުގައި ޓީމު 12 ވަނައިގައި އޮވެ ނިންމާލުމާ ގުޅިގެން، ކްލަބުގެ އައު ވެރިން ކަންކަން ރަނގަޅުކުރުމަށް އޭނާ ގެނައެވެ.

ޕޮޗެޓީނޯ އޭރު ޗެލްސީ އާއެކު ސޮއިކޮށްފައިވަނީ ދެ އަހަރުގެ އެއްބަސްވުމެއްގައެވެ. އަދި ކްލަބަށް އިތުރު އަހަރަކަށް ކޮންޓްރެކްޓް އައުކުރުމުގެ ފުރުސަތު އޮތެވެ. ނަމަވެސް ވަރަށް އުނދަގޫކޮށް ސީޒަން ފެށިނަމަވެސް، ނިމެންކައިރިވެފައިވަނިކޮށް ނަތީޖާތައް ރަނގަޅުކޮށް، ޔޫރަޕިއަން ފުޓުބޯޅަ ކުޅުމުގެ ފުރުސަތު ހޯދައި، ހަވަނައިގައި އޮވެ ނިންމާލިނަމަވެސް، އޭނާ ވަނީ އެ ކްލަބު ދޫކޮށްލަން ނިންމައިފައެވެ.