މި އަހަރުގެ ފަތުރުވެރިކަމުގެ ޕީކް ސީޒަނަށް ތައްޔާރުވުމުގެ ގޮތުން މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް) ގެ އޮޕަރޭޝަނަލް ޓީމުތަކުން ސަރުކާރުގެ ކަމާބެހޭ އިދާރާތަކާއެކު ހާއްސަ މަޝްވަރާ ބައްދަލުވުމެއް ބާއްވައިފި އެވެ.
މައި އެއާޕޯޓު ވީއައިއޭ ހިންގާ އެމްއޭސީއެލްގެ މެނޭޖިން ޑިރެކްޓަރު އަދި ސީއީއޯ އިބްރާހީމް ޝަރީފް މުހައްމަދު ބައިވެރިވެވަޑައިގެންނެވި މި ބައްދަލުވުން ބޭއްވީ އިއްޔެގަ އެވެ.
އެ ބައްދަލުވުމުގައި ކުރިއަށް އޮތް ދުވަސްވަރު އެއާޕޯޓުގެ ހިދުމަތްތަކަށް ގެނައުމަށް ހަމަޖެހިފައިވާ މުހިންމު ބަދަލުތަކުގެ ތަފުސީލުތައް ހިއްސާ ކުރެވުނެވެ. މީގެ އިތުރުން ޓޫރިޒަމް ޕީކް ސީޒަނަށް އެއާޕޯޓުގެ ހިދުމަތްތައް އަވަސްކޮށް، އޮމާންކަމާއެކު ކުރިއަށް ގެންދިއުމަށް ޓަކައި އެކި މުއައްސަސާތަކުގެ މެދުގައި އޮންނަ ގުޅުން އިތުރަށް ބަދަހިކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ.
މި ބައްދަލުވުމުގައި އެމްއޭސީއެލުން ވަނީ އެއާޕޯޓުގެ ތަރައްގީއާއި، ފުޅާވަމުން އަންނަ އޮޕަރޭޝަންތަކަށް ތައްޔާރުވުމުގެ ގޮތުން ކުރިއަށްދާ މަސައްކަތްތަކުގެ ފަހުގެ މައުލޫމާތުތައް ސަރުކާރުގެ ކަމާބެހޭ ފަރާތްތަކާ ހިއްސާކޮށްފަ އެވެ.
ރާއްޖޭގެ ފަތުރުވެރިކަމުގައި "ޕީކް ސީޒަން" ކިޔަނީ އާންމުކޮށް ނޮވެމްބަރު މަހުން ފެށިގެން އޭޕްރީލް މަހުގެ ނިޔަލަށް އޮންނަ ދުވަސްވަރަށެވެ. މިއީ ރާއްޖެއަށް އެންމެ ގިނައިން ފަތުރުވެރިން އަންނަ އަދި ރިސޯޓުތަކާއި އެއާޕޯޓުގެ އޮޕަރޭޝަންތައް އެންމެ ބާރުބޮޑުވާ ދުވަސްވަރެވެ.
ކޮންމެ އަހަރެއްގެ ޕީކް ސީޒަނަށް ތައްޔާރުވުމުގެ ގޮތުން އެމްއޭސީއެލްގެ އެއާޕޯޓު އޮޕަރޭޝަންގެ ޓީމުތަކުން އަންނަނީ ބައްދަލުވުންތައް ބާއްވަމުންނެވެ. އެ ފަދަ ބައްދަލުވުންތަކުގައި އެންމެ އެކަށީގެންވާ ގޮތަކަށް ކަންކަން ކުރިއަށް ގެންދިއުމަށް މަޝްވާތައް ކުރެ އެވެ.
ކޮމެންޓް