އަންނަ އަހަރުގެ ބަޖެޓު މިއަދު މަޖިލީހަށް ހުށަހަޅަނީ

އަންނަ އަހަރަށް ލަފާކުރާ ދައުލަތުގެ ބަޖެޓު މިއަދު އޮންނަ ރައްޔިތުންގެ މަޖިލީހަށް ހުށަހެޅުމަށް އެޖެންޑާކޮށްފިއެވެ.

މަޖިލީހުގެ ވެބްސައިޓުގައި ޝާއިއުކޮށްފައިވާ އެޖެންޑާގައިވާ ގޮތުން، މި ޖަލްސާ ފެށުމަށް ހަމަޖެހިފައިވަނީ މެންދުރުފަހު 01:30 ގައެވެ. ނަމަވެސް އަންނަ އަހަރަށް ހުށަހަޅާ ބަޖެޓުގެ ޖުމްލަ އަދަދާ ގުޅޭ އެއްވެސް މައުލޫމާތެއް ފިނޭންސް މިނިސްޓްރީން މިހާތަނަށް ހާމަކޮށްފައެއް ނުވެއެވެ.

މި އަހަރަށް ދައުލަތުން ފާސްކޮށްފައިވަނީ ރެކޯޑު އަދަދެއް ކަމަށްވާ 64.2 ބިލިއަން ރުފިޔާގެ ބަޖެޓެކެވެ. މިއީ މައިގަނޑު ގޮތެއްގައި މި އަހަރު ދައްކަންޖެހުނު 1.1 ބިލިއަން އެމެރިކާ ޑޮލަރުގެ ދަރަނި އަދާކުރުމަށްޓަކައި ކަނޑައެޅި ބޮޑު ބަޖެޓެކެވެ. ރާއްޖޭގެ ބޭރުގެ ދަރަނި އިންތިހާއަށް ބޮޑުވުމާ ގުޅިގެން ވޭތުވެދިޔަ އަހަރު ބައިނަލްއަގުވާމީ ކްރެޑިޓް ރޭޓިން އެޖެންސީތަކުން ރާއްޖޭގެ ރޭޓިން ދަށްކޮށްފައިވެއެވެ.

އެހެން ނަމަވެސް، މި އަހަރުގެ ތެރޭގައި ދައްކަންޖެހުނު މުހިންމު ބޮޑެތި ދަރަނިތައް ދައްކައި، ކައިރި މުސްތަގުބަލެއްގައި ދަރަނި ނުދެއްކިދާނެ ކަމުގެ ހިރާސް ސަރުކާރުން ބޮޑުތަނުން ކުޑަކޮށްފައިވެއެވެ. އޭގެ ތެރޭގައި މިދިޔަ އެޕްރީލް މަހު އަނބުރާ ދެއްކި 500 މިލިއަން ޑޮލަރުގެ ސުކޫކާއި، ރިޒާވް ބޭންކް އޮފް އިންޑިއާ (އާރްބީއައި)އިން ނެގި 400 މިލިއަން ޑޮލަރުގެ ކަރަންސީ ސްވަޕް ފެސިލިޓީ ދެއްކުން ހިމެނެއެވެ. އަދި ސްޓޭޓް ބޭންކް އޮފް އިންޑިއާ (އެސްބީއައި) މެދުވެރިކޮށް މެއި އަދި ސެޕްޓެމްބަރު މަހު ހަމަޖެއްސި 100 މިލިއަން ޑޮލަރުގެ ސެކިއުރިޓީޒް އިންވެސްޓްމަންޓްތަކާއި، 100 މިލިއަން ޑޮލަރުގެ ޔޫރޯބޮންޑު އަނބުރާ ދެއްކުން 2031 ވަނަ އަހަރަށް ފަސްކުރުން ވެސް ހިމެނެއެވެ.

މި ފިޔަވަޅުތަކާ އެކު، ފިޗް ރޭޓިންގްސް އިން މިދިޔަ ޖޫން މަހު ރާއްޖޭގެ ރޭޓިން 'CC' އިން 'CCC-' އަށް މަތިކޮށްފައިވެއެވެ. އަދި އޮކްޓޯބަރު މަހުގެ ކުރީކޮޅު މޫޑީސް އިން ވެސް ރާއްޖޭގެ ރޭޓިން 'Caa2' އިން 'Caa1' އަށް ސްޓޭބަލް އައުޓްލުކަކާ އެކު މަތިކޮށްފައިވެއެވެ.