ރަސްމާލޭގައި ކުރިއަށްގެންދެވޭ ތަރައްގީގެ މަޝްރޫއުގެ ސަބަބުން، ރައްޔިތުން ކަންބޮޑުވާންޖެހޭ ސަބަބެއް ނެތް ކަމަށާ، މިކަމުގެ ސަބަބުން ތަރައްގީ އިތުރަށް ކަށަވަރުވެގެންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
"ނޭޝަން ޗެޓް" ޕޮޑްކާސްޓް ސިލްސިލާގެ 6 ވަނަ އެޕިސޯޑްގައި ވާހަކަފުޅުދައްކަވަމުން ރައީސް ވަނީ މި މަޝްރޫއުގެ މަސައްކަތްތަކާ ގުޅިގެން އެއްވެސް އަސާސެއް ނެތި މުޖުތަމައުގައި ފެތުރޭ ބައެއް އަޑުތަކާއި އެކަމުގެ ހަގީގަތުގެ މައްޗަށް އަލިއަޅުއްވާލައްވާފައެވެ. އެގޮތުން ހުރިހާ ކަމަކާ ދެކޮޅަށް ތެދުވާ ބަޔަކު އުޅުނު ކަމުގައިވީ ނަމަވެސް، ކަންކަމުގެ ރަނގަޅު ގޮތާއި ގޯސް ގޮތަކީ ކޮބައިތޯ ބަލާ، އެތަނުން ރަނގަޅު ގޮތް ހިޔާރުކުރާ ބަޔަކުވެސް މުޖުތަމައުގައި އުޅޭކަން ރައީސް ވަނީ ފާހަގަކުރައްވާފައެވެ.
މި މޭރުމުން ވާހަކަ ދައްކަވަމުން ރައީސް ވަނީ ރަސްމާލެ މަޝްރޫއު ކުރިއަށްގެންދާ ގޮތާމެދު ރައްޔިތުންގެ ހިތުގައި ފިތުނައާއި ބިރުވެރިކަން އުފެދޭ ގޮތަށް، ދެކެވޭ ވާހަކަތަކުގައި އެއްވެސް އަސާސެއް ނެތްކަން ހާމަކުރައްވާފައެވެ. އަދި މި ސަރުކާރުން އިޒްރޭލާ ދެކޮޅަށް އަޅާފައިވާ ފިޔަވަޅު އެގޮތުގައި އަބަދުވެސް ދެމިއޮންނާނެ ކަމަށް ވިދާޅުވިއެވެ.
ރަސްމާލޭގައި ބޭރުގެ ފަރާތަކުން އިންވެސްޓްކުރުމުގެ ސަބަބުން ތަރައްގީ އިތުރަށް ކަށަވަރުވެގެންދާކަން ފާހަގަކުރައްވާ ރައީސް ވިދާޅުވީ މިފަދަ މަޝްރޫއެއްގެ ސަބަބުން، ދިވެހި ރައްޔިތުންނަށް އޮތް ބޯހިޔާވަހިކަމުގެ ފުރުސަތު ހަނިވެގެން ނުދާނެ ކަމަށެވެ. އަދި ރަސްމާލެއިން ބޯހިޔާވަހިކަމަށް އެދި ހުށަހެޅި ފަރާތްތަކުގެ ތެރެއިން، ހުރިހާ ގިންތިއަކުން ޝަރުތުހަމަވާ ހުރިހާ ރައްޔިތުންނަށް ބޯހިޔާވަހިކަން ކަށަވަރުވާނެ ކަމަށް ރައީސް ވަނީ ވިދާޅުވެފައެވެ.
ރަސްމާލެ ތަރައްޤީކުރުމުގެ މަޝްރޫއާއެކު ފެށިގެންދާނީ ބޯހިޔާވަހިކަމުގެ ރަންޒަމާނެއް ކަމަށާ، އެގޮތުން ކުރިއަށް އޮތް 2 އަހަރު ދުވަހަކީ، ތާރީހު ދެކެފައި ނުވާ މިންވަރަށް، ދިވެހި ރައްޔިތުންނަށް ފުރަތަމަ ބޯހިޔާވަހިކަން ކަށަވަރުކޮށްދެވޭނެ ދުވަސްތަކެއް ކަމުގައި ރައީސްގެ ވާހަކައިގައި ވަނީ ފާހަގަކުރައްވާފައެވެ.
ކޮމެންޓް