ރައްޔިތުން ބޭނުންވާ ނަތީޖާ ނެރެވޭނީ ކައުންސިލްތައް މާލީގޮތުން ބާރުވެރިކުރެވިގެން ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފު އުމަރު ވިދާޅުވެއްޖެ އެވެ.
އެ މަނިކުފާނު މިހެން ވިދާޅުވީ ހދ. އަތޮޅު ކައުންސިލްގެ އެދުމަކަށް އެ ކައުންސިލާ އެކު، މިއަދު މިނިސްޓްރީގައި ބޭއްވި ބައްދަލު ކުރެއްވުމުގައި ވާހަކަފުޅު ދައްކަމުން މިނިސްޓަރު ވިދާޅުވީ ލާމަރުކަޒީ ނިޒާމަށް ގެނެވުނު އިސްލާހާ ގުޅިގެން އަތޮޅު ކައުންސިލް ހިންގުމުގެ ނިޒާމަށް ބަދަލު ގެނެވުނުކަމުގައިވިޔަސް، ސަރުކާރުގެ އަމާޒަކީ އަތޮޅު މާލިއްޔަތުގައި ހުރި ފައިސާ ކުރިއަށް އޮތްތަނުގައި ވެސް އަތޮޅުގެ ރައްޔިތުންނަށް މަންފާ ކުރާނެ ގޮތަކަށް ބޭނުން ކުރެވިގެން ދިޔުން ކަމަށެވެ.
އަދި އަތޮޅު ކައުންސިލުން، އަތޮޅުގައި ބާއްވަމުންއައި މުބާރާތްތައް ފަދަ އަތޮޅުގެ ރައްޔިތުންނާ ގުޅުންހުރި ކަންކަން ކުރިއަށް އޮތްތަނުގައި ވެސް ކުރިޔަށް، ގެންދެވޭނެ ގޮތަކަށް ކަންކަން އިންތިޒާމު ކުރުމާބެހޭ ގޮތުން ލޯކަލް ގަވަމަންޓް އޮތޯރިޓީއާ މަޝްވަރާ ކުރައްވަމުންދާ ކަމުގައި މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ ސަރުކާރުގެ މުއައްސަސާތަކާއި، ސަރުކާރު ހިއްސާވާ ކުންފުނިތަކުން އެދޭ ކަންކަމުގައި ކައުންސިލްތަކުން ފުރިހަމަ އެއްބާރުލުން ދޭ ކަމަށާއި، ވުމާ އެކު ކައުންސިލްތަކުން އެދޭ ކަންކަމުގައި ވެސް ސަރުކާރުގެ މުއައްސަސާތަކާއި، ސަރުކާރު ހިއްސާވާ ކުންފުނިތަކުން އެއްބާރުލުން ދެއްވަން ޖެހޭނެ ކަމަށް ގަބޫލު ކުރައްވާ ކަމަށެވެ.
"ކައުންސިލްތަކާއިސަރުކާރުގެ މުއައްސަސާތަކާ ދެމެދު ރަނގަޅު ކޮމިއުނިކޭޝަނެއް ގާއިމުވާން ޖެހޭ" މިނިސްޓަރު ވިދާޅުވި އެވެ.
ލާމަރުކަޒީ ނިޒާމަކީ ވަރަށް ބޭނުންތެރި ނިޒާމެއް ކަމަށާއި، ކައުންސިލްތަކުން ރައްޔިތުންގެ ގާތަށް ގޮސްގެން ރައްޔިތުންނަށް ހިދުމަތް ކުރުމަކީ މި ނިޒާމުން ފެންނަ އެންމެ ރީތި ސިފަކަމުގައި މިނިސްޓަރު ވިދާޅުވި އެވެ.
"ރަށްރަށުގައި ބަލިހާލުގައި ދާންމަތިވެފައި ތިބޭ މީހުންގެ ގާތަށް ގޮސް ކައުންސިލުން އެމީހުންގެ ހާލު ބަލަމުން ގެންދޭ" އެ މަނިކުފާނު ވިދާޅުވި އެވެ.
ކޮމެންޓް