ލިލީގަ ޔޫއްޕެވެސް އުޅެނީތަ؟

ލިލީގެ އައު ޓްރެއިލާއިން ރާއްްޖޭގެ އެންމެ މަޝްހޫރު އެކްޓަރ ޔޫސުފު ޝަފީޢު (ޔޫއްޕެ) ވެސް ފެނިފައިވެއެވެ.

ހެޔޮނުވާނެ ކަލޭމެން ކައިރީ މީހުން ތިބޭކަށެއް! އެހާވެސް ނުބައި މީހެއް ކަލޭމެން ތީ!“ ޓްރެއިލާގަ ޔޫއްޕެ މިހެން ބުނެއެވެ.

މި މަހުގެ 21 ވަނަ ދުވަހު ލިލީ އަޅުވަން އަނެއްކާ މި ވަނީ ހަމަޖެހެފައެވެ.

ލިލީ ފިލްމަށް ބޮޑު ތަރުހީބެއް ލިބި އަނެއްކާ އިތުރު ޝޯތަކެއް އެޅުވުމަށް ލިލީ ޓީމުން ވަނީ ނިންމާފައެވެ. ލިލީގެ ޖުމުލަ 10 ޝޯ ދެއްކުމަށްފަހު ގިނަ ޝޯތަކެއް ހައުސްފުލް ވުމުގެ ސަބަބުން ވަނީ ދަންވަރު ޝޯތައްވެސް މީގެ ކުރިން އަޅުވާފައެވެ.

މި ފިލްމު ރިލީޒް ކުރުމުގެ ކުރިން، ޖޫން މަހުން ފެށިގެން ކުރަމުން އައި ޕްރޮމޯޝަންގެ ތެރެއިން ފިލްމަށް އޮތް ޝައުގުވެރިކަން ވަނީ ވަރަށް ބޮޑަށް އިތުރުކޮށްފައެވެ.

އެ ފިލްމުގެ ޓައިޓަލް ރިލީޒްކުރުމަށް ކުރި ކެމްޕޭންގައި، ސޯޝަލް މީޑިއާގައި ގިނަ ބަޔަކަށް ލިލީ މާ ބަހާފައިވުމުން، މުޅި ރާއްޖޭގައި އެދުވަސްވަރު އޮތީ އެވާހަކައެވެ.

ކްރިއޭޓިވް ނެޓްވޯކްއިން ޕްރޮޑިއުސްކޮށް، އަޒްހާން އިބްރާހީމް ޑައިރެކްޓު ކުރާ، ކްރައިމް ތުރިލާއެއްގެ ގޮތުގައި ގެނެސްދޭ މި ފިލްމަކީ ކުޑަކުދިންނަށް ދިމާވާ އަނިޔާތަކާއި، ގެވެށި އަނިޔާގެ ޝިކާރައަކަށް ވެފައިވާ އަންހެނެއްގެ ހިތި ދިރިއުޅުމަކުން އަރައިގަތުމުގެ ތަޖުރިބާ ގެނެސްދޭނެ ފިލްމެކެވެ.

ފިލްމުގެ ކާސްޓުންގެ ތެރޭގައި އައިޝާގެ އިތުރުން މުހައްމަދު އިޝްފާން، އަހުމަދު ޝާރިފް، މަރިޔަމް ޝިމާ ފެނެއެވެ. މީގެ އިތުރުން ދިވެހި ސިނަމާގެ ސިނިއާ ތަރިން ކަމަށްވާ އަހުމަދު ނިމާލް، މަރިޔަމް ހަލީމް، އާރިފާ އިބްރާހީމް އަދި އަލީ ފާރޫޤު ވެސް މި ފިލްމުން ފެނެއެވެ.

މި ފިލްމުން މިހާތަނަށް ވަނީ ބެލުންތެރިންގެ ބޮޑު ތަރުހީބެއް ހޯދާފައެވެ.