ލ. ގަމުގައި ޕަބްލިކް ވޯކްސް ޔުނިޓެއް ވަރަށް އަވަހަށް ގާއިމުކޮށްދޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ގަމު ރައްޔިތުންނާ ރޭ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ އުމްރާނީ ތަރައްގީގެ ގިނަ މަސައްކަތްތަކެއް ކުރެވިގެން ދާއިރު މަގުތަކާއި ބަނދަރުތައް ބެލެހެއްޓުމުގެ އިތުރުން އެ ތަންތަނުގެ މެއިންޓަނަންސް މަސައްކަތަކީ މުހިންމު ކަމެއް ކަމަށެވެ. ރަށުން ބޭރުގެ ޕަބްލިކް ވޯކްސް ޔުނިޓަކުން ތަކެތި ގެނެސްގެން މަސައްކަތްކުރާ ގޮތް ބަދަލުކުރަން ނިންމާފައިވާ ކަމަށް އެމަނިކުފާނު ވިދާޅުވި އެވެ.
''މި ރަށުގައި (ލ.ގަމުގައި) ޕަބްލިކް ވޯކްސް ޔުނިޓެއް އަޅުގަނޑުމެން ގާއިމުކޮށްދޭނަން'' އެ މަނިކުފާނު ވިދާޅުވި އެވެ. ގަމުގައި ޕަބްލިކް ވޯކްސް ޔުނިޓް ގާއިމުކުރުމަށް ޓަކައި ބޭނުންވާ ބަޖެޓު ހަމަޖައްސާފައިވާ ކަމަށާއި، މިހާރު ކުރިއަށްދަނީ ތަކެތި ހޯދުމުގެ މަސައްކަތް ކަމަށް ރައީސް ޑރ. މުއިއްޒުގެ ވާހަކަފުޅުގައި ވިދާޅުވި އެވެ.
"ތަކެތި އަންނަން ނަގާނެ ދޮޅުމަހެއް ދެ މަހެއްހާ ދުވަސް، އަމާޒަކީ މި އަހަރު ނިމެންވާ އިރަށް ތަކެތި ގެނައުން'' އެ މަނިކުފާނު ވިދާޅުވި އެވެ.
ރައީސް ޑރ. މުއިއްޒު ވިދާޅުވީ ގަމުގެ ޕަބްލިކް ވޯކްސްއަށް ބޭނުންވާ މެޝިނަރީޒާއި، ޕަބްލިކް ވޯކްސް ޔުނިޓުގެ މެޝިނަރީޒް ވަރަށް އަވަހަށް އެ ރަށަށް ގެންދާނެ ކަމަށެވެ. އަދި އެ ކަމަށް ބޭނުންވާ މުވައްޒަފުން ނަގައި، އެ ރަށުގައި މަސައްކަތްތައް ވަރަށް އަވަހަށް ހިނގަން ފަށާނެ ކަމުގެ ޔަގީންކަން ގަމުގެ ރައްޔިތުންނަށް އެމަނިކުފާނު ދެއްވި އެވެ.
ކޮމެންޓް