އައްޑޫ ސިޓީ ބައިބައިކުރުމުން ވަކިވަކި ރަށްރަށަށް ލިބޭނެ އިތުރު ފައިދާއެއް ނެތް ކަމަށާއި އެ ސިޓީގެ ތަރައްގީއަށް އެންމެ ބޮޑަށް ބޭނުމީ އެ ތަނުގައި ދިރިއުޅޭ އާބާދީ އިތުރު ކުރެވޭނެ ގޮތެއް ހޯދުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި އެ މަނިކުފާނު މި ގޮތަށް ވިދާޅުވީ އައްޑޫ ސިޓީ ކައުސިން އެކުލެވިފައިވާ ގޮތް ބަދަލުކުރުމަށް ޓަކައި އައްޑޫ، ހުޅުދޫ އާއި މީދޫ އާއި އެ އަތޮޅު ފޭދޫ ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމަށް ތައްޔާރުވަމުން އަންނަ ވަގުތެއްގަ އެވެ.
ރައީސް ނަޝީދު ވިދާޅުވީ ގާނޫނު އަސާސީގައި ބުނާ ޝަރުތު ހަމަވާ ފަންނީ، އަދި ތައުލީމީ ބޭރު މީހުންނަށް ވަކި މުއްދަތަކަށް އައްޑޫ ސިޓީގައި ވަޒީފާ އަދާކުރުމަށް ޝަރުތުކޮށް ދިވެހި ރައްޔިތުކަން ދިނުމަކީ ރަނގަޅު ސިޔާސަތެއް ކަމަށެވެ.
އެ މަނިކުފާނު ވިދާޅުވީ އިސްލާމީ އުއްމަތެއްގައި މި ފަދަ ފުރުސަތުގެ ބޭނުން ހިފާނެ ޒުވާން އިންޖިނިއަރުންނާއި ޑޮކްޓަރުންނާއި ޓީޗަރުންގެ އިތުރުން އެ ނޫން ވެސް ފަންނީ މީހުން ބައިވަރު ތިބޭނެ ކަމަށެވެ.
"އައްޑޫއަކީ 50 ހާސް މީހުން ދިރިއުޅޭ ސިޓީއަކަށް ހެދިދާނެ،" ނަޝީދު ވިދާޅުވި އެވެ.
ކޮމެންޓް