އަންނަ އަހަރުގެ ކުރީކޮޅު ލ. މާބައިދޫ ސިއްހީ މަރުކަޒުގެ ހިދުމަތް 24 ގަޑިއިރަށް ބަދަލުކޮށްދޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކުފާނު މިކަން ހާމަކުރެއްވީ މިއަދު މާބައިދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.
ރައީސް ވިދާޅުވީ ސިއްހީ މަރުކަޒުން 24 ގަޑިއިރަށް ހިދުމަތް ދިނުމަށް ބޭނުންވާ ކަންކަން ފުރިހަމަކުރުމަށް ބޭނުންވާ މުވައްޒަފުން ހޯދުމުގެ ކަންކަން ހަމަޖެއްސެމަށް އަންނަ އަހަރުގެ ބަޖެޓްގައި ހިމަނާނެ ކަމަށެވެ.
ރަށުގެ ތަރައްގީއަށް މުހިންމު އިތުރު މަޝްރޫއުތައް ހުރިކަން ފާހަގަ ކުރައްވަމުން ރައީސް ވަނީ، ރަށަށް ދިމާވެފައިވާ ކަރަންޓުގެ މައްސަލައަށް އަވަސް ހައްލެއް ގެނައުމަށް އިތުރު ޖަނަރޭޓަރެއް ގެނެސް ކަރަންޓުގެ މައްސަލައަށް ހައްލު ހޯދައިދޭނެ ކަމަށް ވިދާޅުވެފަ އެވެ.
މީގެ އިތުރުން ޕޮލިސް ސްޓޭޝަން ގާއިމުކުރުމުގެ މަސައްކަތް ވެސް މި އަހަރު ތެރޭގައި ފެށޭނެ ކަމުގައި އެ މަނިކުފާނު ވިދާޅުވި އެވެ.
މިއަދުގެ ޖަލްސާގެ ތެރެއިން ވަނީ މާބައިދޫގެ ތަރައްގީގެ މުހިއްމު މަޝްރޫއުތަކެއްގައި ވެސް ސޮއިކޮށްފަ އެވެ.
ކޮމެންޓް