ރައީސް ޑރ. މުހައްމަދު މުއިއްޒުގެ ސަރުކާރުން ތަރައްގީގެ މަޝްރޫތައް ފަށާތަން ފެނުމުން އިދިކޮޅު އެމްޑީޕީން އުޅެނީ ހިތަށް ނުކުޅަދާނަވެގެން ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ޕީއެންސީ މެމްބަރު މުހައްމަދު ސިނާން ވިދާޅުވެއްޖެ އެވެ.
އެމްޑީޕީއަށް ވަރަށް ބޮޑަށް ފާޑުވިދާޅުވެ، ސިނާން ކުރެއްވި އެކްސް ޕޯސްޓެއްގައި ވިދާޅުވީ އެމްޑީޕީގެ ސިޔާސަތަކީ އެ ބައިމީހުން ނޫން އެހެން އެއްވެސް ބައެއް ވެރިކަން ކުރާނަމަ ރަނގަޅު ހަމަ އެއްވެސް ކަމެއް ކުރެވޭ ކަމަށް ނުހެދުން ކަމަށެވެ.
"ރޯމާ ދުވާލު ބޮޑެތި ވައްކަންތައްކޮށް ދިވެހިން ނިކަމެތި ވަމުން އައި ދުވަސްވަރެއްގަ އަޅުގަނޑުމެންގެ ހިތްވަރު ގަދަ ރައީސް ނިކުމެވަޑަގަތީ މި ނުލަފާ މީހުން ރައްޔިތުންނަށް ވަމުން އައި ހިޔާނާތްތަކުންނާއި އަނިޔާވެރިކަމުން މި ގައުމު ސަލާމަތް ކޮއްދެއްވުމަށް،" ސިނާން ވިދާޅުވި އެވެ.
"ނުހަނު ފަސޭހަކަމާއެކު ބޮޑު ތަނުން ބޮޑު ނޯ އެއް ޖަހާ އެމްޑީޕީ ވެރިކަމުން ދިވެހިން ދުރުކުރީ އެހެންވެ،"
ސިނާން ވިދާޅުވީ މިއަދު ފެންނަމުން ދަނީ ސަރުކާރުގެ ހަރަދު ކުޑަކޮށް ތަރައްގީގެ އެތައް މަޝަރޫއުތަކެއް ފަށަމުން އަންނަތަން ކަމަށާއި އެ މަންޒަރު ފެނުމުން ހިތަށް ކުޅަދާނަ ނުވެގެން ކިޔޭ ނުކިޔޭ އެއްޗެއް ނޭގޭ ހިސާބަށް މި ބައިގަނޑުގެ ކަންތައް ބޮޑުވެއްޖެ ކަމަށެވެ.
"ހަގީގަތަކީ މިއަދު އެމްޑީޕީ އޭ ކިއުނު ވަގުންގެ ބައިގަނޑަށް އެއްވެސް ތާއީދެއް ވެސް ނެތް،" ސިނާން ވިދާޅުވި އެވެ.
ކޮމެންޓް