ރާއްޖޭގެ ދަނޑުވެރިކަމުގެ ސިނާއަތުގައި މަސައްކަތްކުރާ ފަރާތްތަކުގެ ތެރޭގައި އަންހެނުން ގިނަވުމަކީ ލިބޭ އުފަލެއް ކަމަށް އެނިމަލް ވެލްފެއާ މިނިސްޓަރު ޑރ. މަރިޔަމް މާރިޔާ ވިދާޅުވެއްޖެ އެވެ.
އެ ކަމަނާ މި ގޮތަށް ވިދާޅުވީ "ފަހި ދިރުން އެސްޕޯ" ގެ ނަމުގައި ސިޓީސް މިނިސްޓްރީން ހޮނިހިރު ދުވަހު ބޭއްވި އެކްސްޕޯގައި ވާހަކަފުޅު ދައްކަވަމުންނެވެ.
ފަހި ދިރުން އެކްސްޕޯ އަކީ ރާއްޖޭގެ ދަނޑުވެރިންގެ ދުވަހާއި، ދުނިޔޭގެ ކާބޯތަކެތީގެ ދުވަހާއި، އަދި ދުނިޔޭގެ ޖަނަވާރުންގެ ދުވަސް ފާހަގަކުރުމުގެ ގޮތުން މިއަހަރު ކުރިއަށްގެންދެވޭ ހާއްސަ ހަރަކާތެކެވެ.
މާރިޔާ ވިދާޅުވީ ދަނޑުވެރިކަމުގެ ސިނާއަތަކީ އަވަސް ދުވެލީގައި ކުރިއަރަމުން އަންނަ، އަދި ގައުމުގެ އިގުތިސާދަށް ނުހަނު މުހިންމު ދައުރެއް އަދާކުރާ ސިނާއަތެއް ކަމަށާއި އެ ގޮތުން އެންމެ ފަހުގެ ތަފާސްހިސާބުތަކުން ދައްކާ ގޮތުގައި، ރާއްޖޭގައި 7000 އަށްވުރެ ގިނަ ދަނޑުވެރިން މަސައްކަތްކުރަމުން ގެންދާ ކަމަށެވެ.
"މި ދާއިރާގައި ހާއްސަ އެއް ކަމަކީ، މި ސިނާއަތުގައި ރާއްޖޭގައި ހަރަކާތްތެރިވާ ފަރާތްތަކުގެ ތެރެއިން 50 ޕަސެންޓަށްވުރެ ގިނައީ ހީވާގި ކަނބަލުންކަމުގައިވުން، މިއީ އަޅުގަނޑު އުފަލާއެކު ފާހަގަކުރާ ކަމެއް. އެހެނީ މިއީ އަންހެނުންގެ އިގުތިސާދީ ބާރުވެރިކަން އިތުރު ކުރުމަށް މަގުފަހިވެގެންދާ ކަމަކަށްވާތީ،" އެ ކަމަނާ ވިދާޅުވި އެވެ.
ދަނޑުވެރިކަމުގެ ދާއިރާ ކުރިއެރުވުމަށް ޓަކައި މިނިސްޓްރީން ގިނަ ގުނަ މަސައްކަތްތަކެއް ކުރަމުންދާކަން މިނިސްޓަރު ފާހަގަ ކުރެއްވި އެވެ.
މި ގޮތުން ދަނޑުވެރިކަން ކުރާ ރަށްރަށުގައި އިންވެސްޓަރުން ހޯދައި، ރަށުގެ ދަނޑުވެރިކަން ތަރައްގީ ކުރުމަށް ޓަކައި އަމާޒުކޮށްގެން ޕްރޮޖެކްޓްތައް ހިންގުމާއި، ދަނޑުވެރިކަމުގެ ތަފާސްހިސާބު އެއްކުރުމަށް ޒަމާނީ ވަސީލަތްތައް ބޭނުންކޮށްގެން މޮބައިލް އެޕްލިކޭޝަނެއް ތައްޔާރުކޮށްފައިވާ ކަމަށް އެ ކަމަނާ ވިދާޅުވި އެވެ.
މިނިސްޓަރު މާރިޔާ ވިދާޅުވީ ރައީސް ޑރ. މުހައްމަދު މުއިއްޒުގެ ދުރުވިސްނުންތެރި އިރުޝާދަކީ ކޮންމެ ރަށަކުން ވެސް ދަނޑުވެރިކަމަށް ހާއްސަ ބިންތައް ކަނޑައަޅައި، އަމިއްލައަށް ފުދޭވަރަށް ކާބޯތަކެތި އުފެއްދުމަށް މަސައްކަތް ކުރުން ކަމަށާއި އަދި މި ފަދަ މުހިންމު މަސައްކަތަކަށް ސަރުކާރުން ދަނީ ފުރިހަމަ އެއްބާރުލުމާއި ތާއީދު ދެމުން ކަމަށެވެ.
ކޮމެންޓް