ކާމިޔާބު ޑައިރެކްޓަރު މުނައްވަރުގެ "ކަނބުލޮ" އޮގަސްޓުގައި އޮލިމްޕަހަށް

ދިވެހިބަހާއި ތާރީހަށް ހިދުމަތްކުރާ ގައުމީ މަރުކަޒުން 2009 ވަނަ އަހަރު ބޭއްވި ދިގު ވާހަކަލިޔުމުގެ ގައުމީ މުބާރާތުން އެންމެ މޮޅު ވާހަކައަކަށް ހޮވުނު "ޔުކްތާ" ވާހަކައިގެ މައްޗަށް ތައްޔާރުކުރާ ފިލްމު" ކަނބުލޮ" ހޮނިހިރު ދުވަހުގެ ރޭ ލޯންޗުކޮށްފި އެވެ.

ޔަޝްފާ އަބްދުލް ގަނީގެ މި ވާހަކައަށް ތައްޔާރުކުރާ ފިލްމު ކަނބުލޮގެ ޝޫޓިން ނިންމައި މިހާރު ދަނީ އެޑިޓިންގެ މަސައްކަތް ކުރަމުންނެވެ.

އޮލިމްޕަހުގައި ފިލްމު އެޅުވުމަށް ހަމަޖައްސާފައި ވަނީ އޯގަސްޓު މަހުގެ 31ގަ އެވެ.

މި ފިލްމަކީ ދިވެހި މުޖުތަމައުގައި ގެވެށި އަނިޔާ އާއި ކުޑަކުދީންނަށް ކުރަމުންދާ ޖިންސީ ގޯނާ ތަކުގެ މައްޗަށް އަލިއަޅުވާލާފައިވާ ފިލްމެކެވެ.

ކުޑަކުދީންނަށާއި އަންހެނުންނަށް ހިމާޔަތާއި ރައްކާތެރިކަން ދޭން ޖެހޭ މީހުންގެ ފަރާތުން އެ މީހުންނަށް ދެމުންދާ އަނިޔާ ތަކަށް ކެތް ކުރުމަށް މަޖުބޫރު ކުރުވައި، މުޖުތަމައުގައި އަބުރުވެރީންގެ ގޮތުގައި އުޅޭ މީހުން، ގޭތެރޭގައި ފޮރުވިގެން ތިބެ ކުޑަކުދީންނަށް ކުރަމުންދާ ގޯނާ ތަކެވެ. ނުފޫޒު ގަދަ މީހުން އަދުލުއިންސާފުގެ މައްޗަށް އަތް ގަދަ ކުރާ ގޮތެވެ. ނިކަމެތި ކުދީންނަށް ކުރި ޖިންސީ އަދި ޖިސްމާނީ އަނިޔާގެ މައްޗަށް އިންސާފު ހޯދަން އަނިޔާގެ ޝިކާރައަކަށް ވީ ކުއްޖާ ކުރި ހިތްވަރު ގަދަ މަސައްކަތެވެ.

ފިލްމުގެ ކާސްޓުންގެ ގޮތުގައި ފެންނާނީ އިސްމާއީލް ރަޝީދު (ކޮޕީ އިއްސެ) މަރިޔަމް އައްޒަ، އަހުމަދު ނިމާލް، ޝީލާ ނަޖީބު، އަހުމަދު އީސާ، ވާސިއާ މުޙައްމަދު، އަދި މަރިޔަމް ޝަކީލާ އެވެ.

މި ފިލްމު ހުށަހަޅައި ދެނީ ކިޑް ޕްރޮޑަކްޝަނާއި ސެޓާން ސްޓޫޑިއޯ އިންނެވެ.

ފިލްމުގެ ޕްރޮޑިސަރުންނަކީ ކާމިޔާބު ފިލްމު "ކަމަނާ" ގެ ޕްރޮޑިއުސަރު އަލީ ޝާނިޒް މުޙައްމަދު އަދި ހުސެން މުނައްވަރު އެވެ.

މަހުދީ އަހުމަދު ސްކްރީން ޕްލޭ ލިޔެފައިވާ މި ފިލްމުގެ ޑައިރެކްޓަރަކީ ހުސެން މުނައްވަރު އެވެ.

މިއީ މަހުދީގެ ސްކްރީން ޕްލޭގެ މައްޗަށް މުނައްވަރު ޑައިރެކްޓް ކުރާ ހަތަރު ވަނަ ފިލްމެވެ. 2024 ވަނަ އަހަރު ނެރުނު ކަމަނާގެ ޑައިރެކްޓަރަކީ ވެސް ހުސެން މުނައްވަރު އެވެ.