ހައްޖުވެރީންނަށް ބޭންކު ރޭޓުގައި އިތުރު 1750 ޑޮލަރު ދިނުމަށް ރައީސް ނިންމަވައިފި

ރައީސް ޑރ. މުއިއްޒު -- ފޮޓޯ/ ރައީސް އޮފީސް

މި އަހަރު ރާއްޖެއިން ހައްޖަށްދާ ފަރާތްތަކަށް ބޭންކު ރޭޓުގައި އިތުރު 1750 ޑޮލަރު ދިނުމަށް ރައީސް ޑރ. މުޙައްމަދު މުއިއްޒު، ބޭންކު އޮފް މޯލްޑިވްސް (ބީއެމްއެލް)ގައި އެދިވަޑައިގެންފި އެވެ.

ރައީސް، ކުރެއްވި އެކްސް ޕޯސްޓެއްގައި ވިދާޅުވީ މި އަހަރު ހައްޖަށް ވަޑައިގަންނަވާ ފަރާތްތަކަށް ބޭންކުގެ ރަސްމީ ރޭޓުގައި ޑޮލަރު ހޯދުމުގައި ލުއި ފަސޭހަ ހައްލެއް ހަމަޖައްސައިދިނުމުގެ ގޮތުން، ކޮންމެ ހައްޖު ވެރިއެއްގެ ބޭންކު އޮފް މޯލްޑިވްސް ޑެބިޓް ކާޑަށް، މިހާރު އޮންނަ ޑޮލަރުގެ ލިމިޓުގެ އިތުރުން 1750 އެމެރިކާ ޑޮލަރުގެ ލިމިޓެއް ހަމަޖައްސައި ދިނުމަށް ބޭންކް އޮފް މޯލްޑިވްސް ގައި އެދެފައިވާ ކަމަށެވެ.

ދިވެހި ރައްޔިތުންގެ ބޭންކެއްގެ ގޮތުގައި ކުރައްވަމުން ގެންދަވާ ގިނަގުނަ މަސައްކަތްތަކަށް ޓަކައި ރައީސް ވަނީ ބޭންކް އޮފް މޯލްޑިވްސް އަށް ޝުކުރު ދަންނަވާފަ އެވެ.

ބީއެމްއެލް ޑެބިޓް ކާޑަށް އިތުރުކުރި 1750 ޔޫއެސް ޑޮލަރާއެކު، ޑެބިޓް ކާޑުތަކަށް މިހާރު ކަނޑައަޅާފައިވާ 250 ޔޫއެސް ޑޮލަރުގެ ލިމިޓު ވެސް ލިބޭނެ އެވެ. އެހެންކަމުން މި ބަދަލާ ގުޅިގެން ކޮންމެ ހައްޖުވެރިޔަކަށް ބީއެމްއެލް ޑެބިޓް ކާޑުން 2،000 ޑޮލަރުގެ ލިމިޓެއް މިހާރު ލިބޭނެ އެވެ.

ރައީސް ޑރ މުޢިއްޒު ހައްޖުވެރިން