ދިލަކަނީގެ ހޫނުން އުފެދުނު ސަޒާ - "ކަމަނާ" ކިޔައިދެނީ އިޖްތިމާޢީ ބޮޑު މައްސަލައެެއްގެ ވާހަކަ!

ދިވެހި ފިލްމް ކަމަނާ އަކީ ދިވެހިރާއްޖޭގައި ޢާންމުވެފައިވާ އިޖުތިމާޢީ ބޮޑު މައްސަލައެއް ކަމުގައިވާ ގެވެށި އަނިޔާ ކުރުމާއި ދެކޮޅަށް މުޖުތަމަޢު ހޭލުންތެރިކުރުމުގެ ގޮތުން ހަގީގީ ޙާދިސާ އަކަށްއުފައްދާފައިވާ ފިލްމެކެވެ. ފިލްމްގެ ޑައިރެކްޓަރަކީ ސަޒާ، ދިލަކަނި ފަދަ ފިލްމްތައް ބެލުންތެރިންނާއި ހަމަޔަށް ގެނެސްފީފައިވާ ޒުވާން ޑައިރެކްޓަރ ޙުސައިން މުނައްވަރު އެވެ.

ސެޓާރން ސްޓޫޑިއޯ އާއި ކިޑް ޕްރޮޑަކްޝަން ގުޅިގެން އުފައްދައި މިމަހުގެ 27 ވަނަ ދުވަހުގެ ރޭ ރިލީޒް ކުރުމަށް ހަމަޖެހިފައިވާ ދިވެހި ފިލްމް "ކަމަނާ" ފިލްމްގެ ޓިކެޓްގެ ޑިމާންޑްވެ ކޮންމެ ހަފްތާ ބަންދެއްގައި އިތުރު ޝޯވތަކެއް ދެއްކުމަށް ވަނީ ނިންމާފައެވެ.

ސެޓަރން ސްޓޫޑިއޯގެ ފަރާތުން މީޑިއާއަށް މަޢުލޫމާތު ދެމުން ބުނެފައިވަނީ 27 އޯގަސްޓް އިން 14 ސެޕްޓެމްބަރަށް ފިލްމް އޮލިމްޕަހުގައި ދެއްކުމަށް ހަމަޖެހިފައިވާއިރު މިހާތަނަށް 6 ޝޯވ ގެ ޓިކެޓް އެއްކޮށް ވިކި ހުސްފައިވާ ކަމަށާއި، އަދި އޮލިމްޕަސް ސިނަމާ އިތުރު މުއްދަތަކަށް ލިބެން ނެތުމުން ޑިމާންޑަށް ބަލައި ކޮންމެ ހަފްތާ ބަންދެއްގައި އިތުރު ޝޯވތަކެއް ދެއްކުމަށް ނިންމާފައިވާ ކަމަށެވެ.

އެގޮތުން 27 އޯގަސްޓް އިން ފެށިގެން 14 ސެޕްޓެމްބަރާއި ހަމަޔަށް ކޮންމެ ހަފްތާއެއްގެވެސް ބުރާސްފަތި އަދި ހުކުރު ދުވަހުގެ ރޭ 20:30 ގެ ޝޯވގެ އިތުރުން 23:30 ގެ ޝޯވގެ ޓިކެޓް މާދަމާއިން ފެށިގެން ވިއްކަން ފަށާނެ ކަމަށާއި 7458800 އަށް ވައިބަރ ކޮށްގެން ޓިކެޓް ގަނެވޭނެ ކަމަށް އޮފިޝަލު ބުނެފައިވެއެވެ.

މި ފިލްމް ފެށެނީ ހއ. މޮޅަދޫގައި ވަރަށް ލޯބިން ދިރިއުޅެމުންދާ ދެމަފިރިން ކަމަށްވާ ރިމްޝާއާއި ހައިދަރުގެ ދިރިއުޅުމަށް އިތުރު އުފާވެރިކަމެއް ލިބި، ރިމްޝާއަށް ދަރިޔަކު ލިބެން އުޅޭކަން އެނގޭ ހިސާބުންނެވެ.

ނަމަވެސް މި އުފާވެރިކަމަށް ހީވެސް ނުކުރާވަރު ކަޅު ބޯ ވިލާގަނޑެއްގެ ހިޔަނިއެޅި ރިމްޝާގެ ދިރިއުޅުން އެފުށް މިފުށަށް ޖެހިގެންދެ އެވެ. އަދި

މި ފިލްމުގެ އެންމެ ހާއްސަ އެއް ކަމަކީ ރިމްޝާގެ ރޯލަށް މަރިޔަމް އައްޒަގެ ހަށިގަނޑަށް ގެންނަންޖެހުނު ބަދަލެވެ. އަދި މިއީ އައްޒަގެ ފިލްމީ ކެރިއަރުގައި އޭނާ ފެނިފައި ނުވާފަދަ ރޯލެކެވެ.

ފިލްގައި ހައިދަރުގެ ބައި ޔޫސުފް ޝަފީއު (ޔޫއްޕެ) އަދާކުރާއިރު، މިއީ މިފަދަ ބޮޑު ރޯލަކުން އައްޒައާއި ޔޫއްޕެ އެކުގައި ފެންނަ ފުރަތަމަ ފަހަރެވެ.

ފިލްމުގައި އާމިނަތު ރަޝްފާ (އާޝާ)، މުހައްމަދު ރަޝީދު (ދަރާ)، މުހައްމަދު މަނިކު އަދި އައިޝަތު ނަތާޝާ ޖަލީލް (ނަތާ) ގެ މުހިންމު ރޯލުތައް ވެސް ފެނިގެންދެ އެވެ.