ސަސްޕެންޝަންގައި ބެހެއްޓުމަށްފަހު ފަޒީލް މަގާމުން ވަކިކޮށްފި

އެމްޑަބްލިޔުއެސްސީގެ ކުރީގެ ޑީއެމްޑީ ފަޒީލް ރަޝީދު --

"ބިންވެރިޔާ ސްކީމް"ގެ ދަށުން ގޯތި ލިބިފައިނުވާ ބަޔަކަށް ގޯތިތަކެއް ދީފައިވާ ކަމަށް ތުހުމަތު ކުރެވޭ މައްސަލައިގައި ސަސްޕެންޑްކޮށްފައިވާ މާލޭ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ)ގެ ޑެޕިއުޓީ މެނޭޖިން ޑިރެކްޓަރު އިބްރާހިމް ފަޒީލް ރަޝީދު، އެ މަގާމުން ވަކިކޮށްފި އެވެ.

އެ ކުންފުނީގެ ޑީއެމްޑީގެ މަގާމުން ފަޒީލް ސަސްޕެންޑް ކުރީ މިދިޔަ އަހަރުގެ ޖޫން، 19ގަ އެވެ.

އެމްޑަބްލިޔުއެސްސީން މިއަދު ކުރި އެކްސް ޕޯސްޓެއްގައި ބުނީ މާދަމާއިން ފެށިގެން ފަޒީލް، އެ މަގާމުން ވަކި ކުރުމަށް ޑިރެކްޓަރުންގެ ބޯޑުން ނިންމަވާފައިވާ ކަމަށެވެ. އެއީ ކުންފުނީގެ މަސްލަހަތުތައް ރައްކާތެރިކުރުމުގެ ގޮތުން ޑިރެކްޓަރުންގެ ބޯޑުން އެޅުއްވި ފިޔަވަޅެއް ކަމަށް އެމްޑަބްލިޔުއެސްސީން ބުނެ އެވެ.

ފަޒީލުގެ މައްޗަށް ކުރިއަށް ގެންދެވޭ ތަހުގީގާ އެކު އިސްމަގާމެއްގައި މުސާރަޔާ އެކު ދިގު މުއްދަތަކަށް ބެހެއްޓުމަކީ ކުންފުނީގެ މަސްލަހަތު ހިމެނޭ ކަމެއްނޫން ކަމުގައި ބޯޑުން ދެކޭ ކަމަށް އެމްޑަބްލިޔުއެސްސީން ފާހަގަކޮށްފައިވެ އެވެ.

ކުރީގެ ރައީސް އިބްރާހިމް މުޙައްމަދު ސޯލިހުގެ ސަރުކާރުން ފެށި "ބިންވެރިޔާ" ސްކީމްގެ ތެރެއިން ހައްގު ނުވާ ގޯއްޗެއް ލިބުނު މީހުންގެ ތެރޭގައި ފަޒީލް ވެސް ހިމެނެ އެވެ.

ފަޒީލް ރަޝީދަކީ ބިންވެރިޔާ ސްކީމާ ގުޅޭ ކޮރަޕްޝަން މައްސަލަ ފެންމަތިވުމުން އަމިއްލައަށް އިސްތިއުފާ ދެއްވި، އެޗްޑީސީގެ މެނޭޖިން ޑިރެކްޓަރަކަށް ކުރިން ހުންނެވި އިބްރާހިމް ފަޒުލް ރަޝީދުގެ ބޭބެ އެވެ.

އެމްޑަބްލިއުއެސްސީ