ނެޝަނަލް ސާވިސްގެ ޕްރޮގްރާމަށް 1200 އަށްވުރެ ގިނަ ޒުވާނުން ކުރިމަތިލައިފި

މޯލްޑިވްސް ނޭޝަނަލް ސާވިސް، (ދިވެހި ވަތަނީ ހިދުމަތް) ޕްރޮގްރާމްގައި ބައިވެރިވުމަށް ސަރުކާރުން ހުޅުވައިލި ފުރުސަތުގައި 1200 އަށްވުރެ ގިނަ ޒުވާނުން ކުރިމަތިލައިފި އެވެ.

ނޭޝަނަލް ސާވިސްގެ ޕްރޮގްރާމަކީ ރައީސް ޑރ. މުއިއްޒުގެ ހާއްސަ އިސްނެންގެވުމަކަށް، ތަމްރީނާއި ތަރުބިއްޔަތު ލިބިފައިވާ ހަރުދަނާ ދިވެހި ޒުވާން ޖީލެއް ބިނާކުރުމަށް ކުރިއަށް ގެންދާ ޕްރޮގްރާމެކެވެ.

ޑިފެންސް މިނިސްޓްރީން މިއަދު ނެރުނު ބަޔާނެއްގައި ބުނަނީ ދިވެހިރާއްޖޭގެ ގައުމީ ހިދުމަތުގެ ފުރަތަމަ ބުރުގައި ބައިވެރިވާން ހުޅުވައިލި ފުރުސަތުގައި 1244 ޒުވާނުން ފޯމު ހުށަހަޅާފައިވާ ކަމަށެވެ. އަދި ކުރިމަތި ލާފައިވާ ޒުވާނުންގެ ތެރެއިން ޖިސްމާނީ، ސިއްހީ ދުޅަހެޔޮކަން ހުރި ހުރިހާ ފަރާތަކަށް ވެސް ތަމްރީނު ފުރިހަމަ ކުރުމުގެ ފުރުސަތު ދިނުމަށް ސަރުކާރުން ހަމަޖައްސާފައިވާ ކަމަށް އެ ބަޔާނުގައިވެ އެވެ.

އެގޮތުން ދިވެހި ވަތަނީ ހިދުމަތަށް މިހާރު ކުރިމަތިލާފައިވާ ފަރާތްތައް ތަމްރީނަށް ނަގަމުން ގެންދާނީ އެޕްލައި ކޮށްފައިވާ ތަރުތީބުން ލިސްޓު ތަރުތީބު ކުރުމަށްފަހު، އެ ތަރުތީބަށް ބަލައިގެންނެވެ. ޕްރޮގްރާމްގެ ފުރަތަމަ ބުރު ނިމުމާ އެކު ލަސްތަކެއް ނުވެ، ދެ ވަނަ ބުރުގެ ތަމްރީންތައް ފަށާނެ ކަމަށް ވެސް މިނިސްޓްރީން ބުންޏެވެ.

"ދިވެހި ވަތަނީ ހިދުމަތުގެ ތަމްރީނުގެ ސިލެކްޝަން ޕްރޮސެސް ރާއްޖޭގެ އެކި ސަރަހައްދުތަކުގައި ކުރިއަށް ގެންދިއުމަށް ހަމަޖެހިފައި ވާއިރު، އެ ކެނޑިޑޭޑަކަށް އެންމެ ފަސޭހަ ސްޓޭޝަނަކަށް ހާޒިރުވެ ސިލެކްޝަން ޕްރޮސެސްގެ ކަންކަން ފުރިހަމަ ކުރުމުގެ ފުރުސަތު ދެވޭނެ،" މިނިސްޓްރީގެ ބަޔާނުގައި ބުންޏެވެ.