ހިދުމަތްތެރި ރެފްރީ އަދި ދައުލަތަށް ގިނަދުވަހު ޚިދުމަތް ކުރެއްވި މައްލާ ޅަތުއްތު އަވަހާރަވެއްޖެ

ދިވެހިރާއްޖޭގައި އުފެދުނު އެންމެ މޮޅު އެއް ފުޓްބޯޅަ ރެފުރީ، އަދި ދައުލަތަށް ވަރަށް ގިނަދުވަހު ޚިދުމަތް ކުރެއްވި  މައްލާ ޅަތުއްތު މިއަދު މެންދުރުގެ ވަގުތެއްގައި އަވަހާރަވެއްޖެއެވެ.

މައްލާ އަވަހާރަވެވަޑައިގެންނެވީ އިންޑިއާގެ ޓްރިވެންޑްރަމްގެ ހޮސްޕިޓަލެއްގެ އައިސީޔޫގައި ފަރުވާ ހޯއްދަވަމުން ގެންދަވަނިކޮށެވެ.

މައްލާއަކީ ދިވެހިރާއްޖޭގެ ފުޓްބޯޅަ ރެފުރީކަމުގެ ދާއިރާގައި ގިނަގުނަ ކާމިޔާބީތަކެއް ހޯއްދަވާފައިވާ ބޭފުޅެކެވެ. އޭނާއަކީ ފީފާ ބެޖު ހާސިލުކުރެއްވި ފުރަތަމަ ދިވެހި ރެފުރީއެވެ. މައްލާ ރާއްޖޭގެ އެންމެ މަތީ ފަންތީގައި ރެފުރީކަން ކުރައްވާފައިވަނީ 1969 އިން 1995 އަށެވެ. އަދި ފީފާ ބެޖުގައި ރެފުރީކަން ކުރައްވާފައިވަނީ 1990 އިން 1993 އަށެވެ.

މައްލާގެ ފަންނީ ހުނަރުވެރިކަން ބައިނަލްއަޤްވާމީ މައިދާނުގައިވެސް ފާހަގަކުރެވިފައިވެއެވެ. އޭނާ ވަނީ އޭޝިއަން ކުލަބު ޗެމްޕިއަންޝިޕާއި، ސާފް ގޭމްސް އަދި ސްރީ ލަންކާގެ ފުރަތަމަ ޑިވިޝަނުގައިވެސް ރެފުރީކަން ކުރައްވާފައެވެ.

މައްލާގެ އަގުހުރި ޚިދުމަތްތައް ފާހަގަކޮށް، 2021 ވަނަ އަހަރު ދިވެހި ކުޅިވަރަށް ޚިދުމަތްކުރުމުގެ ރޮނގުން ޝަރަފުވެރިކަމުގެ ގައުމީ އިނާމު އޭނާއަށް ލިބިވަޑައިގެންފައިވެއެވެ.

މައްލާ ޅަތުއްތު، ސަރުކާރުގެ ޚިދުމަތަށް ނުކުމެވަޑައިގަތީ 16 އަހަރުގައި، 1964 ވަނަ އަހަރު ސިފައިންގެ މީހެއްގެ ވަޒީފާއަށެވެ. އޭގެ ފަހުން ހޯމް އެފެއާޒްގައި އިނގިރޭސި ކާތިބުކަމާއި ކުޅިވަރު ބައިގެ ސެކްރެޓަރީކަން ކުރެއްވިއެވެ. އެސްޓީއޯގައި 16 އަހަރު ޚިދުމަތްކުރައްވައި، އެންމެފަހުން ސޭލްސް ޑިޕާޓްމަންޓްގެ އެސިސްޓެންޓް ޑިރެކްޓަރުކަން ކުރެއްވިއެވެ. ކޮންސްޓްރަކްޝަން އެންޑް ޕަބްލިކް ވާކްސް މިނިސްޓްރީގައި 11 އަހަރަށްވުރެ ގިނަ ދުވަހު ޚިދުމަތްކުރައްވައި، ފައިނޭންސް ސެކްޝަނާއި މާލޭ ހާބަރ ސެކްޝަން ބެލެހެއްޓެވިއެވެ.

އެންމެފަހުން ޚިދުމަތްކުރެއްވީ ރައްޔިތުންގެ މަޖިލީހުގެ އިދާރާގައެވެ. އެތަނުގައި 6 އަހަރަށްވުރެ ގިނަ ދުވަހު ޚިދުމަތްކުރައްވައި، އެސިސްޓެންޓް ޑިރެކްޓަރ ޖެނެރަލް، ޑެޕިއުޓީ ޑިރެކްޓަރ ޖެނެރަލް އަދި އެންމެފަހުން ޑިރެކްޓަރ ޖެނެރަލްގެ މަޤާމު ފުރުއްވިއެވެ.