ޕެރަގުއޭގެ އައު ސަފީރު، ރައީސަށް ފަތްކޮޅު އަރުވައިފި

ޕެރަގުއޭގެ ސަރުކާރުން ރާއްޖެއަށް ކަނޑައެޅުއްވި އައު ނޮން-ރެޒިޑެންޓް ސަފީރު، ފްލެމީ ރައުލް ދުއަރްތޭ ރަމޯސް، އެމަނިކުފާނުގެ ސަފީރުކަމުގެ ފަތްކޮޅު ރައީސް ޑރ. މުޙައްމަދު މުއިއްޒުއަށް މިއަދު އަރުވައިފި އެވެ.

މިއަދު ހެނދުނު އޮތް ފަތްކޮޅު އެރުވުމުގެ މި ރަސްމިއްޔާތަށް، ޖުމްހޫރީ މައިދާނުން ފެށިގެން ރައީސް އޮފީހާ ހަމައަށް ސަފީރު ވަޑައިގެންނެވީ ހަތްކޮޅުގައި، ރަސްމީ އިއްޒަތުގައި ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާ އެކު ހިންގަވާފަ އެވެ.

ޕެރަގުއޭގެ އައު ސަފީރު، އެމަނިކުފާނުގެ ސަފީރުކަމުގެ ފަތްކޮޅު ރައީސް މުއިއްޒަށް އެރުވުމުން، އެމަނިކުފާނު ވަނީ އައު ސަފީރަށް ތަހުނިޔާ ވިދާޅުވެ، ރާއްޖެއަށް ވަޑައިގެންނެވިކަމަށް ޓަކައި މަރުހަބާ ވިދާޅުވެފަ އެވެ.

އެއަށްފަހު އައު ސަފީރާ ރައީސްއާ ބައްދަލުކުރައްވައި، ދެގައުމުގެ ގުޅުން އިތުރަށް ބަދަހިކުރެވިދާނެ ދާއިރާތަކާ ގުޅޭގޮތުން، ދެބޭފުޅުން މަޝްވަރާ ކުރެއްވި އެވެ. ދެ ބޭފުޅުން މަޝްވަރާ ކުރެއްވި ކަންކަމުގެ ތެރޭގައި، އިގުތިސާދީ ގޮތުން އެއްބާރުލުން ދިނުމާއި، ތައުލީމީ ދާއިރާއިން އެއްބާރުލުން ދިނުމާއި، ފަތުރުވެރިކަން އިޝްތިހާރު ކުރުމަށް އެކުގައި މަސައްކަތް ކުރުން ހިމެނެ އެވެ.

މީގެ އިތުރުން ކުޅިވަރާއި، މުނިފޫހިފިލުވުމުގެ ދާއިރާއިން އެއްބާރުލުން އިތުރު ކުރުމާއި، ދެ ގައުމުގެ މެދުގައި ސަގާފީ ގުޅުން ބަދަހިކޮށް، އެއްބައިވަންތަކަން އިތުރު ކުރުމަށް ވެސް ދެބޭފުޅުން ވާހަކަފުޅު ދެއްކެވިއެވެ.

އަދި ދެ ގައުމަށް ފައިދާ ކުރަނިވި ކަންކަމުގައި އެކުގައި މަސައްކަތް ކުރުމަށް ހުރި އިތުރު ފުރުސަތުތައް ހޯދުމަށް، ގުޅިގެން މަސައްކަތް ކުރުމަށް ބޭނުންވާކަން ދެ ބޭފުޅުން ވެސް ވަނީ ހާމަ ކުރައްވާފަ އެވެ.

ރާއްޖެއާ ޕެރަގުއޭއާ ދެމެދު ސިޔާސީ ގުޅުން ގާއިމުކުރީ 2010 ވަނަ އަހަރުގެ ސެޕްޓެމްބަރު މަހުގެ 28 ވަނަ ދުވަހުގަ އެވެ.