ރޯވި އެޕާޓްމެންޓުގެ މީހުންނަށް ވަގުތީ ހިޔާވަހިކަން ދީފި

އަލިފާން ރޯވި އެޕާޓްމެންޓް --

ހުޅުމާލެ ދެވަނަ ފިޔަވަހީގެ ވިނަރެސް އެޕާޓްމެންޓެއްގައި ހިނގި އަލިފާނުގެ ހާދިސާއާ ގުޅިގެން އެ އެޕާޓްމަންޓުގައި ދިރިއުޅޭ މީހުންނަށް މިހާރު ވަގުތީ ހިޔާވަހިކަން ހަމަޖައްސާފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.

މިއަދު ހެނދުނު 7:41 ހާއިރު ރޯވެފައި ވަނީ ހުޅުމާލޭ ދެ ވަނަ ފޭހުގައި ހުންނަ ވިނަރެސް ފުލެޓުގެ 13 ވަނަ ފަންގިފިލާގެ، ހަ ވަނަ އެޕާޓްމަންޓުގަ އެވެ.

އެންޑީއެމްއޭއިން ބުނީ އަލިފާނުގެ ހާދިސާގެ ސަބަބުން އެޕާޓްމެންޓުގައި މީހުންނަށް ދިރިނޫޅެވޭ ވަރަށް ގެއްލުން ލިބިފައި ކަމަށެވެ.

އެހެންވެ، މި ހާލަތުގައި އެޕާޓްމެންޓްގައި ދިރިއުޅޭ ހަތަރު މީހަކަށް ފަސް ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއުން އަދި ދެ މީހަކަށް އަންނައުނު ފޯރުކޮށްދީފައިވާ ކަމަށް އެ އޮތޯރިޓީން ބުންޏެވެ.

މި ހާދިސާގެ މަޢުލޫމާތު ލިބުމާ އެކު، އެމްއެންޑީއެފްގެ ފަޔާ ފައިޓަރުން އެ އެޕާޓްމެންޓަށް ވަދެ، ރޯވި އަލިފާން ވަނީ ނިއްވާލާފަ އެވެ.

އަލިފާނުގެ މި ހާދިސާގައި މީހަކަށް އަނިޔާއެއް ލިބިފައެއް ނުވެ އެވެ. ނަމަވެސް ރޯވި އެޕާޓްމެންޓްގެ ކޮޓަރިއެއްގެ ތެރޭގައި ހުރި ބަންކްބެޑެއްގެ ގޮދަޑިއެއް ވަނީ އަނދާފަ އެވެ. އޭގެ އިތުރުން، މުޅި ތަނަށް ކަޅު ދުމުގެ އަސަރުކޮށް، ކޮޓަރި ތެރޭގައި ހުރި ފަރުނީޗަރުތަކަށާއި އޭސީއަށް އެކިވަރުގެ ގެއްލުންތައް ލިބިފައިވެ އެވެ.

އެންޑީއެމްއޭ އަލިފާނުގެ ހާދިސާ