އޯއައިސީ އިތުރަށް ހަރުދަނާކޮށް، އެކުގައި މަސައްކަތް ކުރުމަށް ގޮވައިލައްވައިފި

މުސްލިމް އުންމަތަށް ދިމާވެފައިވާ މައްސަލަތަކަށް ހައްލު ހޯދުމަށް އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިތުރަށް ހަރުދަނާކޮށް، މެމްބަރު ގައުމުތަކުން އެކުގައި މަސައްކަތް ކުރުމަށް ފޮރިން މިނިސްޓަރު ޑރ. އަބްދުﷲ ހަލީލް ގޮވައިލައްވައިފި އެވެ.

އޯއައިސީގެ ހާރިޖީ ވަޒީރުންގެ ކައުންސިލްގެ 51 ވަނަ ބައްދަލުވުމުގައި ހަލީލް ދެއްވި ތަގުރީރުގައި އިސްލާމީ އުންމަތަށް ދިމާވެފައިވާ ގޮންޖެހުންތަށް ހައްލު ކުރުމަށާއި ސުލްހަ އާއި އިންސާފު ގާއިމު ކުރުމަށް އޯއައިސީ ހަރުދަނާކޮށް އަދި މެމްބަރު ގައުމުތަކުގެ މެދުގައި އެއްބާރުލުން އިތުރު ކުރުމުގެ މުހިންމު ކަމަށް އަލިއަޅުއްވާލެއްވި އެވެ.

އެމަނިކުފާނުގެ ތަގުރީރުގައި އިސްރާއީލުން މެދުކެނޑުމެއްނެތި ގައްޒާ އަދި ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ އަނިޔާވެރިކަން ކުށްވެރިކުރައްވައި އެކަމާ ކަންބޮޑުވުން ފާޅު ކުރެއްވި އެވެ.

އަދި ރާއްޖެއިން ފަލަސްތީނުގެ މައްސަލައިގައި ގެންގުޅޭ ސިޔާސަތުކަމުގައިވާ، 1967 ވަނަ އަހަރުގެ ކުރިން ކަނޑައެޅިފައި އޮތް އިންތަކުގެ މައްޗަށް ބިނާކޮށް، އިރުމަތީ ގުދުސްއަކީ ފަލަސްތީނުގެ ވެރިކަން ކުރާ ރަށްކަމުގައި ކަނޑައަޅައި، މިނިވަން އަދި އަމިއްލަ ސިޔާދަތީ ބާރު ހިނގާ ދައުލަތެއްގެ ގޮތުގައި ފަލަސްތީނުގެ ދައުލަތް ގާއިމު ކުރުމަށް ވަކާލާތު ކުރުމުގައި ރާއްޖެއިން އަބަދު ވެސް ދެމި އޮންނާނެ ކަމުގެ ޔަގީންކަން އެރުވި އެވެ.

އޭގެ އިތުރުން ފަލަސްތީނު މިނިވަން މުސްތަގިއްލު ދައުލަތެއްގެ ގޮތުގައި ބަލައިގަތުމަކީ މެދުއިރުމަތީގައި ސުލްހަ އާއި އިންސާފު ގާއިމު ކުރުމަށް ޒަރޫރީ ކަމެއް ކަމަށާއި އަދި މި މަގުސަދު ހާސިލު ކުރުމަށް އޯއައިސީގެ ހުރިހާ ގައުމު ތަކުގެ މެދުގައި އެއްބާރުލުން އިތުރުކުރުމަށް ވެސް މިނިސްޓަރު ހަލީލް ވަނީ ގޮވައިލައްވާފަ އެވެ.

އެމަނިކުފާނުގެ ތަގުރީރުގައި، އިސްރާއީލުން އީރާނަށް ދެމުންގެންދާ ހަމަލާތައް ކުއްވެރި ކުރައްވައި، އިސްރާއީލުގެ މައްޗަށް ބައިނަލްއަގުވާމީ ގާނޫނު ތަންފީޒު ކުރުމަށް ވެސް ގޮވައިލެއްވި އެވެ.

މި ބައްދަލުވުމުގެ ހަވާސާގައި، އިސްރާއީލުން އިރާނަށް ދެމުންގެންދާ ހަމަލާތަކާ ގުޅޭ ގޮތުން މަޝްވަރާ ކުރުމަށް ބޭއްވި ހާއްސަ ބައްދަލުވުމުގައި ވެސް ދިވެހި ވަފުދުން ވަނީ ބައިވެރިވެފަ އެވެ.

ހާރިޖީ ވަޒީރުންގެ ކައުންސިލްގެ މި ބައްދަލުވުމަކީ ކޮންމެ އަހަރަކުވެސް އޯއައިސީގެ ގައުމުތަކުގެ ހާރިޖީ ވަޒީރުން އެއްތަނަކަށް އެއްވެ އިސްލާމީ އުއްމަތަށް ދިމާވެފައިވާ މުހިންމު މައްސަލަތަކަށް ހައްލު ހޯދުމާ ގުޅޭ ގޮތުން މަޝްވަރާ ކުރުމަށް ބާއްވާ ބައްދަލުވުމެކެވެ.