ކަރެކްޝަން ސީޕީގެ ނަމުގައި ފުޓްސަލް މުބާރާތެއް ފަށައިފި

މޯލްޑިވްސް ކަރެކްޝަނަލް ސާވިސް (އެމްސީއެސް)ގެ އޮފިސަރުންނަށާއި މުވައްޒަފުންނަށް ހާއްސަކޮށް، ޕްރިޒަން ކުލަބުން ކޮމިޝަނާ އޮފް ޕްރިޒަންސްގެ ނަމުގައި ޕީއާރުސީ ސީޕީ ފުޓްސަލް ޓޯނަމެންޓް 2025 ރޭ ފަށައިފި އެވެ.

މާފުށީ ޖަލުގައި ބޭއްވި ރަސްމިއްޔާތުގައި، އެ ޓޯނަމެންޓް އިފުތިތާހު ކޮށްދެއްވީ ޕްރޮސެކިއުޓާ ޖެނެރަލް އައްބާސް ޝަރީފު އެވެ.

މި ރަސްމިއްޔާތުގައި ކޮމިޝަނާ އޮފް ޕްރިޒަންސް ހަސަން ޒަރީރު، ޑެޕިއުޓީ ކޮމިޝަނާ އޮފް ޕްރިޒަންސް އިބްރާހިމް މުޙައްމަދު ދީދީގެ އިތުރުން ކޮމިޝަނާ ޖެނެރަލް އޮފް ކަސްޓަމްސް ފާރިމަތު ދިޔާނާ އާއި ކޮންޓްރޯލާ ޖެނެރަލް އޮފް އިމިގްރޭޝަން ކޮމިޝަނާ އޮފް ޕޮލިސް (ރިޓަޔާޑް) އަހުމަދު ފަސީހު އާއި އެމްސީއެސްގެ ކޮމިޝަންޑް އޮފިސަރުންނާއި ޕްރިޒަން އޮފިސަރުން ބައިވެރިވެ އެވެ.

އަންނަ ޖުލައި މަހުގެ ހަތަރު ވަނަ ދުވަހުގެ ނިޔަލަށް ކުރިއަށްދާ ޓޯނަމެންޓް، ފިރިހެން އަދި އަންހެން ޑިވިޒަނަށް ބަހާލެވިފައިވާއިރު، މި ޓޯނަމެންޓް ކުރިއަށް ދާނީ ލީގު އުސޫލުންނެވެ.

އެގޮތުން ފިރިހެން ޑިވިޒަންގައި އެންމެ ޕޮއިންޓް ގިނަ ހަތަރު ޓީމު ސެމީ ފައިނަލްގައި ވާދަކޮށް، ސެމީ އިން މޮޅުވާ ދެ ޓީމް ފައިނަލްގައި ވާދަ ކުރާނެ އެވެ. އަދި އަންހެން ޑިވިޒަންގައި އެންމެ ޕޮއިންޓް ގިނަ ޓީމް ސީދާ ފައިނަލަށް ގޮސް، ދެ ވަނަ، ތިން ވަނަ އަށް އެންމެ ޕޮއިންޓް ގިނަ ދެ ޓީމް ސެމީ ކުޅެ، މޮޅުވާ ޓީމް އެންމެ ޕޮއިންޓް ގިނަ ޓީމާ ވާދަކުރާ ގޮތަށެވެ.

މި ޓޯނަމެންޓްގެ ފިރިހެން ޑިވިޒަންގައި ޓީމް އެޗްކިއު، ޓީމް މާފުށީ ޕްރިޒަން، ޓީމް ހުޅުމާލޭ ޕްރިޒަން، ޓީމް އައްސޭރި ޕްރިޒަން އަދި ޓީމް އީއެސްޖީ ހިމެނޭއިރު، އަންހެން ޑިވިޒަންގައި ޓީމް އެޗްކިއު، ޓީމް މާފުށީ ޕްރިޒަން، ޓީމް އައްސޭރި ޕްރިޒަން އަދި ޓީމް އައިކޯސްޓް ހިމެނެ އެވެ.

ރޭ ކުޅުނު މުބާރާތުގެ ފުރަތަމަ މެޗްގައި ވާދަ ކޮށްފައިވަނީ ޓީމް މާފުށީ ޕްރިޒަން އާއި ޓީމް އީއެސްޖީ އެވެ. ފޯރިގަދަ ކުޅުމަކަށްފަހު މެޗް ކާމިޔާބު ކޮށްފައިވަނީ 2-1 އިން ޓީމް މާފުށީ ޕްރިޒަނުންނެވެ.

ޓީމް މާފުށީ ޕްރިޒަންގެ ދެ ލަނޑު ޖަހާފައިވަނީ އަލީ ނާއިފް އާއި އަބްދުﷲ ޝާކިރު އެވެ. ޓީމް އީއެސްޖީ ލަނޑު ޖަހާފައިވަނީ މުޙައްމަދު އަލީ ރަޝީދުއެވެ.

މި މެޗްގެ މޭން އޮފް ދަ މެޗަށް ހޮވިފައިވަނީ ޓީމް މާފުށީ ޕްރިޒަންގެ އަބްދުﷲ ޝާކިރު އެވެ.