އިސްލާމީ އުއްމަތަށް ދިމާވާ މައްސަލަތަކާބެހޭ މަޝްވަރާއަށް ހަލީލް ތުރުކީއަށް

އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ހާރިޖީ ވަޒީރުންގެ މަޖިލީހުގައި ބައިވެރިވެވަޑައިގަތުމަށް ފޮރިން މިނިސްޓަރު ޑރ. އަބްދުﷲ ހަލީލް ތުރުކީ އަށް ވަޑައިގެންފި އެވެ.

މިނިސްޓަރު ހަލީލް ކުރެއްވި އެކްސް ޕޯސްޓެއްގައި ވިދާޅުވީ މި އޯއައިސީގެ ހާރިޖީ ވަޒީރުންގެ މަޖިލީހުގައި ބައިވެރިވުމަށް ތުރުކީގެ އިސްތަންބޫލަށް ވަޑައިގެންފައިވާ ކަމަށެވެ. އަދި އިސްތަންބޫލަށް ވަޑައިގަތުމާ އެކު މަރުހަބާ ދެންނެވީ ތުރުކީއަށް ކަނޑައަޅުއްވާފައި ހުންނަވާ ރާއްޖޭގެ ސަފީރު، ލެފްޓިނަންޓް ޖެނެރަލް (ރިޓަޔާޑް) އަބްދުއްރަހީމް އަބްދުއްލަތީފް، ކަމަށް އެކަނިކުފާނު ވިދާޅުވި އެވެ.

އޭގެ އިތުރުން ތުރުކީ ސަރުކާރުހެ ފަރާތުން ކީ ހޫނު މަރުހަބާއަށް ވެސް މިނިސްޓަރު ވަނީ ޝުކުރު އަދާކުރައްވާފަ އެވެ.

ފޮރިން މިނިސްޓްރީން ބުނީ މިނިސްޓަރު ހަލީލްގެ މި ދަތުރުފުޅުގައި އޯއައިސީގެ ހާރިޖީ ވަޒީރުންގެ ބައްދަލުވުމުގައި އެމަނިކުފާނު ތަގުރީރު ކުރައްވާނެ ކަމަށެވެ. އެ ތަގުރީރުގައި އިސްލާމީ އުއްމަތަށް ދިމާވެފައިވާ މުހިންމު މައްސަލަތަކަށް ހައްލު ހޯދުމާ ގުޅޭ ގޮތުން މަޝްވަރާ ކުރައްވާނެ ކަމަށެވެ. އަދި އިސްރާއީލުން ގައްޒާ އާއި ޕަލަސްތީނުގެ ރައްޔިތުންނާ ދެކޮޅަށް ހިންގަމުންދާ އަނިޔާވެރި އަމަލުތައް ކުށްވެރި ކުރައްވާނެ ކަމަށް މިނިސްޓްރީން ބުންޏެވެ.

އޭގެ އިތުރުން އިސްރާއީލުން އިސްވެ، އީރާނާ ދެކޮޅަށް ދެމުން އަންނަ ހަމަލާތައް ކުށްވެރި ކުރައްވާނެ ކަމަށާއި އަދި އިސްރާއީލުގެ މައްޗަށް ބައިނަލްއަގުވާމީ ގާނޫނު ތަންފީޒު ކުރަން ވެސް މިނިސްޓަރު ހަލީލް ގޮވައިލައްވާނެ ކަމަށް އެ މިނިސްޓްރީން ބުނެފައިވެ އެވެ.