މިއަހަރު ނިމުމުގެ ކުރިން ހުރިހާ ސުކޫލެއް އޭސީކޮށް ނިމޭނެ: މިނިސްޓަރު

އެޑިއުކޭޝަން މިނިސްޓަރު އިސްމާއީލް ޝަފީއު: ފޮޓޯ/ އެޑިއުކޭޝަން

ކޫލް ސުކޫލް ޕްރޮޖެކްޓްގެ ދަށުން ސުކޫލުތަކަށް މިއަހަރު ނިމުމުގެ ކުރިން ހުރިހާ ސުކޫލެއް އޭސީކޮށް ނިންމާލެވޭނެ ކަމަށް އެޑިއުކޭޝަން މިނިސްޓަރ ޑރ. އިސްމާއީލް ޝަފީއު ވިދާޅުވެއްޖެ އެވެ.

މަތީ އަރުތަވެރީންގެ އިނާމު ދިނުމުގެ ޖަލްސާގެ ތިން ވަނަ ދަންފަޅީގައި ވާހަކަފުޅު ދައްވަމުން މިނިސްޓަރު ޝަފީއު ވިދާޅުވީ ދަރިވަރުންނަށް ދެވޭ ހިދުމަތުގެ ފެންވަރު ރަނގަޅުކުރުމާ އެކު މުދައްރިސުންނަށް ފަހި ވެއްޓެއް ގާއިމު ކުރުމަށް ނިސްޓްރީން ގިނަ މަސައްކަތްތަކެއް ކުރަމުން ގެންދާ ކަމަށެވެ. އަދި ދަރިވަރުންގެ ނަތީޖާ ރަނގަޅު ކުރެވޭނީ ދަރިވަރުންނަށް ދެވޭ ހިދުމަތުގެ ފެންވަރު ރަނގަޅުކުރުމާ އެކު، ހިތްހަމަޖެހޭ ސުކޫލު ވެއްޓެއް ގާއިމުކޮށްގެން ކަމަށް ވެސް އެމަނިކުފާނު ވިދާޅުވި އެވެ.

މިނިސްޓަރު ޝަފީއު އިތުރަށް ވިދާޅުވީ މިދިޔަ އަހަރާ އަޅާ ބަލާއިރު މި އަހަރު ތައުލީމީ ދާއިރާގެ ބަޖެޓަށް 300 މިލިއަނެއްހާ ރުފިޔާ އިތުރުކުރެވިފައިވާ ކަމަށެވެ.

އަދި ދަރިވަރުންނަށް ދޭން ޖެހޭ ވަސީލަތްތައް ދެނެގަތުމާއި އެކު ރައީސްގެ ވައުދުފުޅެއް ކަމަށްވާ ކޫލް ސުކޫލް ޕްރޮޖެކްޓް، ޓެކްނޮލޮޖީ އިންޓަގްރޭޝަން އަދި މެނިފެސްޓޯގައި ހިމެނޭ ޓީޗަރުން ތަމްރީނު ކުރުމުގެ ގައުމީ ޕްރޮގްރާމް ފަދަ ކަންކަން ތަންފީޒު ކުރުމަށް އެކަށީގެންވާ ބަޖެޓެއް އަންނަ އަހަރުގެ ބަޖެޓުގައި ވެސް ހިމަނުއްވާނެކަން މިނިސްޓަރުގެ ވާހަފުޅުގައި ފާހަގަ ކުރެއްވި އެވެ.

އިސްމާއީލް ޝަފީއު