ބްރައިޓަން އިން ރަޓަރގެ 40 މިލިއަން ޕައުންޑުގެ ރިލީސް ކްލޯސް އެކްޓިވޭޓްކޮށްފި

ބްރައިޓަން އިން ލީޑްސް ޔުނައިޓެޑްގެ ފޯވަރޑް ޖޯޖީނިއޯ ރަޓަރގެ 40 މިލިއަން ޕައުންޑުގެ ރިލީސް ކްލޯސް އެކްޓިވޭޓްކޮށްފިއެވެ. މީގެ ކުރިން ބްރައިޓަން އިން ހުށަހެޅި އެތައް އޮފަރެއް ބަލައިނުގަތުމަށްފަހު، މިހާރު ރިލީސް ކްލޯސް އެކްޓިވޭޓްކުރުމާއެކު، 22 އަހަރުގެ މި ކުޅުންތެރިޔާ ބްރައިޓަނަށް ބަދަލުވުމުގެ ނިންމުން އޮތީ އޭނާގެ އަތްމަތީގައެވެ.

ބުދަ ދުވަހުގެ ރޭ ލީޑްސްގެ އެލަންޑް ރޯޑް ސްޓޭޑިއަމްގައި ބޭއްވުނު ކެރަބާއޯ ކަޕްގެ ފުރަތަމަ ބުރުގެ މެޗުގައި މިޑްލްސްބްރޯއާ ދެކޮޅަށް ކުޅުނު މެޗުގެ ދެވަނަ ހާފުގައި ރަޓަރ ވަނީ ބައިވެރިވެފައެވެ. އެ މެޗުން ލީޑްސް ވަނީ 3-0 އިން ބަލިވެފައެވެ.

ބުރާސްފަތި ދުވަހުގެ މެންދަމު 12:00 ގެ ކުރިން ރަޓަރގެ ކޮންޓްރެކްޓްގައިވާ ރިލީސް ކްލޯސް އެކްޓިވޭޓްކޮށްފައިވަނީ ހަމައެކަނި ބްރައިޓަން އިން ކަމަށް ލަފާކުރެވެއެވެ.

މި އަހަރުގެ ކުރީކޮޅު އާރޗީ ގްރޭ ޓޮޓެންހަމަށާއި ކްރައިސެންސިއޯ ސަމަރވިލް ވެސްޓްހެމަށް ވިއްކާލުމަށްފަހު، މިހާރު ލީޑްސް އިން ދަނީ ރަޓަރ އެ ޓީމުގައި ހިފެހެއްޓުމަށް މަސައްކަތްކުރަމުންނެވެ.

ފްރާންސްގެ މި ފޯވަރޑް ކުޅުންތެރިޔާ ލީޑްސްއާ ގުޅުނީ 2023 ވަނަ އަހަރުގެ ޖެނުއަރީ މަހު ހޮފެންހައިމް އިންނެވެ. އޭރު އެއީ ލީޑްސްގެ ރެކޯޑު އަގެއްގައި ހެދުނު ޑީލެކެވެ. އެ ޑީލްގެ އަގު 35 މިލިއަން ޕައުންޑަށް އަރާނެ ކަމަށް ލަފާކުރެވެއެވެ. ރަޓަރގެ ކޮންޓްރެކްޓްގައި އަދިވެސް 4 އަހަރު ބާކީ އޮތްކަން ފާހަގަކޮށްލެވެއެވެ.