އެމްޕޮކްސް ފެތުރިދާނެތޯ ބެލުމަށް ރިސްކު އެސެސްމެންޓެއް ހަދަން ފަށައިފި

އެމްޕޮކްސް ބައްޔަކީ ބައެއް ފަހަރަށް ފުރާނައަށް ނުރައްކާވާފަދަ ބައްޔެއް

ރާއްޖޭގައި އެމްޕޮކްސް ފެތުރިދާނެތޯ ބެލުމަށް ރިސްކު އެސެސްމެންޓެއް ހަދަން ފަށާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފިއެވެ.

މިކަން ކުރަން ފަށާފައި މިވަނީ ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން އެމްޕޮކްސް އަކީ އާންމު ސިއްހަތުގެ ކުއްލި ނުރައްކަލެއްގެ ގޮތުގައި އިއުލާނުކުރުމާ ގުޅިގެންނެވެ.

އެޗްޕީއޭ އިން މިއަދު "އެކްސް" ގައި ބުނެފައިވަނީ ރިސްކު އެސެސްމެންޓު ހަދާ ނިމުމުން އަޅަން ޖެހޭ ފިޔަވަޅުތައް އަންގަމުންދާނެ ކަމަށެވެ.

ޑަބްލިއުއެޗްއޯގެ ޑިރެކްޓާ ޖެނެރަލް، ޓެޑްރޯސް އަދަނޮމް ގެބްރިޔޭސުސް ވިދާޅުވެފައިވަނީ އެފްރިކާގައި އެމްޕޮކްސް ފެތުރެމުންދާތީ، އާންމު ސިއްހަތުގެ ކުއްލި ނުރައްކާ އިއުލާނު ކުރައްވާ ކަމަށެވެ. މި ބަލި ފެތުރެން ފެށީ ކޮންގޯގައެވެ. އަދި މިހާރު އެ އިންފެކްޝަން އަވައްޓެރި ގައުމުތަކަށް ވަނީ ފެތުރެން ފަށާފައެވެ.

ކުއްލި ނުރައްކަލުގެ ހާލަތަކީ ޑަބްލިއުއެޗްއޯގެ އެންމެ މަތީ ދަރަޖައިގެ އެލާޓެވެ. މީގެ މަގުސަދަކީ ބައްޔެއް ކޮންޓްރޯލް ކުރުމަށް ދިރާސާކުރުމާއި ފައިސާ ހަރަދު ކުރުމާއި ބައިނަލްއަގުވާމީ އާންމު ސިއްހަތުގެ ފިޔަވަޅުތަކާއި އެއްބާރުލުން ދިނުން އަވަސްކުރުމެވެ.

އެމްޕޮކްސް ފެތުރޭނީ ގައިގޯޅިވުމުގެ ތެރެއިންނެވެ. އާންމު ގޮތެއްގައި މިއީ ވަރަށް މަދު ހާލަތެއްގައި ނޫނީ ނުރައްކާތެރި ބައްޔެއް ނޫނެވެ. އޭގެ ސަބަބުން ރޯގާ ފަދަ އަލާމާތްތަކާއި ހަށިގަނޑުގައި ބޮޑެތި ބިހިތައް ނަގައެވެ.

އެޗްޕީއޭ ސިއްޙަތު