ނައިބު ރައީސް އެންމެފަހުން ބޭރަށް ކުރެއްވި ދެ ދަތުރުފުޅަށް ހަރަދުވީ 1.8 މިލިއަން ރުފިޔާ: ރައީސް އޮފީސް

ނައިބު ރައީސް ޕެރިހަށް ކުރެއްވި ދަތުރުފުޅުގެ ތެރެއިން / ފޮޓޯ:ރައީސް އޮފީސް

ނައިބު ރައީސް ހުސެއިން މުހައްމަދު ލަތީފް އީރާނާއި ފްރާންސްގެ ޕެރިހަށް ކުރެއްވި ދަތުރުފުޅަށް 1.8 މިލިއަން ރުފިޔާ ހޭދަވެފައިވާކަމަށް ރައީސް އޮފީހުން އިއްޔެ ހާމަކޮށްފިއެވެ.

ރައީސް އޮފީހުން ބުނިގޮތުގައި މިދިޔަ މަހުގެ 24 އިން 29 އަށް ނައިބު ރައީސް އޮލިމްޕިކްސް ކުޅިވަރު މުބާރާތް ފެށުމުގެ ރަސްމިއްޔާތުގައި ބައިވެރިވެވަޑައިގަތުމަށް ފްރާންސްގެ ވެރިރަށް ޕެރިހަށް ކުރެއްވި ދަތުރުފުޅަށް 1.3 މިލިއަން ރުފިޔާ ހޭދަވެފައިވެއެވެ. އަދި އީރާނުގެ އައު ރައީސްގެ ހުވާކުރުމުގެ ރަސްމިއްޔާތުގައި ބައިވެރިވެވަޑައިގަތުމަށް ކުރެއްވި ދަތުރުފުޅަށް 464,617 ރުފިޔާ ހޭދަވެފައިވާކަމަށް ރައީސް އޮފީހުން ބުނެފައިވެއެވެ.

ނައިބު ރައީސް ފްރާންސަށް ކުރެއްވި ދަތުރުފުޅުގައި އޮލިމްޕިކްސް ފެށުމުގެ ރަސްމިއްޔާތުގައި ބައިވެރިވެވަޑައިގަތުމުގެ އިތުރުން، އެތުލީޓުންނާ ބައްދަލުކުރައްވައި ހިތްވަރު ދެއްވިކަމަށާއި، ކުޅިވަރު ތަރައްޤީކުރުމާ ގުޅޭގޮތުން މަޝްވަރާކުރެއްވިކަމަށް ރައީސް އޮފީހުން ބުނެފައިވެއެވެ. އަދި ފްރާންސްގައި ދިރިއުޅޭ ދިވެހިންނާއި ކިޔަވާ ކުދިންނާވެސް ބައްދަލުކުރެއްވިކަމަށް ހާމަކޮށްފައިވެއެވެ.

އީރާނަށް ކުރެއްވި ދަތުރުފުޅުގައި އެ ޤައުމުގެ އިސްވެރިންނާ ބައްދަލުކުރައްވައި ފަލަސްތީނުގެ މައްސަލައާ ގުޅޭގޮތުން މަޝްވަރާކުރެއްވިކަމަށްވެސް ރައީސް އޮފީހުން ބުނެފައިވެއެވެ.

މި ސަރުކާރު ވެރިކަމާއި ހަވާލުވެ ވަޑައިގެންނެވުމަށްފަހު ސަރުކާރުގެ އިސްވެރިން ކުރައްވާ ދަތުރުތަކުގެ ޚަރަދާއި ހާސިލްކުރެވޭ ކަންކަމުގެ ތަފްސީލް އާންމުކުރަމުން ގެންދާކަން ފާހަގަކޮށްލެވެއެވެ.

ނައިބު ރައީސް ޙުސައިން މުޙައްމަދު ލަތީފް