ދައުލަތުގެ ޚަރަދާއި އާމްދަނީގެ މަޢުލޫމާތު އާންމުކުރަން ނިންމައިފި

ކުރިން ސިއްރުކުރަން ނިންމާފައިވާ ދައުލަތުގެ ޚަރަދާއި އާމްދަނީ އަދި ދަރަނީގެ ސިޔާސަތު އާންމުކުރަން ނިންމާފައިވާ ކަމަށް ފިނޭންސް މިނިސްޓަރު ޑރ. މުޙައްމަދު ޝަފީޤު މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގައި މިއަދު ވާހަކަފުޅު ދައްކަވަމުން މިނިސްޓަރު ވިދާޅުވީ، ދައުލަތުގެ ދަރަންޏާއި މާލީ ސިޔާސަތު ފިނޭންސް މިނިސްޓްރީގެ ވެބްސައިޓާއި ސަރުކާރުގެ ގެޒެޓުގައި ވެސް އާންމުކުރާނެ ކަމަށެވެ. އަދި ދަރަނީގެ ސްޓްރެޓެޖީ އަދި ފިސްކަލް ސްޓްރެޓެޖީ ސިއްރުކުރުމުގެ ނިޔަތެއް ނެތް ކަމަށާއި، އެއީ ރައްޔިތުންނަށް ތަފްސީލުކޮށް އެނގެން ޖެހޭ މަޢުލޫމާތެއްކަން ވެސް މިނިސްޓަރު ފާހަގަކުރެއްވިއެވެ.

ދައުލަތުގެ ޚަރަދަށް ޒިންމާވުމުގެ ޤާނޫނުގައިވާ ގޮތުން، ކޮންމެ އަހަރެއްގެ ޖުލައި މަހުގެ ނިޔަލަށް ފިސްކަލް ސިޔާސަތުގެ ބަޔާނާއި ދަރަނީގެ ސްޓްރެޓެޖީ ބަޔާން މަޖިލީހާ ހިއްސާކުރަންޖެހެއެވެ. ފިސްކަލް ސިޔާސަތުގެ ބަޔާނަކީ ސަރުކާރުގެ ގެޒެޓުގައި ޝާއިޢުކުރަންޖެހޭ ލިޔުމެކެވެ.

ޤާނޫނުގައި ބަޔާންކޮށްފައިވާ ގޮތުން، ފިސްކަލް ސްޓްރެޓަޖީ ބަޔާނުގެ މަޤްޞަދަކީ ދައުލަތުގެ ޚަރަދާއި އާމްދަނީގެ ސިޔާސަތާ މެދު އާންމު ހޭލުންތެރިކަން އިތުރުކުރުމާއި، އެ ސިޔާސަތުގެ އަމާޒުތައް ހާސިލުކުރުމަށް ސަރުކާރުން އަޅަމުންދާ ފިޔަވަޅުތައް ވަޒަންކުރެވޭނެ ވަސީލަތެއް ޤާއިމުކުރުމެވެ.

ދަރަނީގެ ސްޓްރެޓަޖީ ބަޔާނުގެ މަޤްޞަދަކީ ދައުލަތުގެ ދަރަނި ހަރުދަނާ އުސޫލުތަކެއްގެ މަތިން އަދާކޮށް ބަލަހައްޓަމުން ގެންދިޔުމަށްޓަކައި ސަރުކާރުން އަޅަމުންދާ ފިޔަވަޅުތައް ދެނެގަތުމަށް ބޭނުންވާ މަޢުލޫމާތު ފޯރުކޮށްދިނުމެވެ.

މީގެ ކުރިން ވެސް މާލީ ވުޒާރާއިން މި ރިޕޯޓުތައް މަޖިލީހާ ހިއްސާކުރުމަށް ފަހު ވެބްސައިޓުގައި އާންމު ވެސް ކުރާކަމެވެ. މިފަހަރު މިނިސްޓަރު މި މަޢުލޫމާތު އާންމުކުރަން ނިންމެވުމަކީ، ކުރިން ސިއްރުކުރަން އެދިވަޑައިގަތް ނިންމުން ބަދަލުކުރެއްވި ކަމެއްގެ ގޮތުގައި ދޭހަވެއެވެ.

މިކަމުން ސަރުކާރުގެ މާލީ ސިޔާސަތުތަކާ ގުޅޭ މުހިންމު މަޢުލޫމާތު ރައްޔިތުންނަށް ހާމަކުރުމުގެ މުހިންމުކަން ސަރުކާރުން ބަލައިގަންނަކަން ހާމަވެއެވެ.