ގަދަ ވިއްސާރަ އާއި ގުޅިގެން މާދަމާ ސަރުކާރު ބަންދު

ރާއްޖެއަށް މިހާރު ކުރަމުންދާ ގަދަ ވިއްސާރައާ ގުޅިގެން މާދަމާއަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ކަނޑައަޅުއްވައިފިއެވެ.

ރައީސް އޮފީހުން ނެރުނު ބަޔާނެއްގައި ބުނެފައިވަނީ، ރާއްޖޭގެ ވަރަށް ގިނަ ރަށްތަކަށް ބޯކޮށް ވާރޭވެހި މޫސުން ގޯސްވުމުގެ ސަބަބުން، ކިޔަވާ ކުދިންނާއި ވަޒީފާ އަދާކުރާ ފަރާތްތަކަށް ވެސް ދަތުރުފަތުރުކުރުމާއި ހިނގާބިނގާވުމަށް ދަތިވެފައިވާތީ، އެފަރާތްތަކަށް ލުޔެއް ދިނުމުގެ ގޮތުން މާދަމާ ސަރުކާރު ބަންދު ދުވަހެއްގެ ގޮތުގައި ހަމަޖައްސަވާފައިވާ ކަމަށެވެ.

މިހާރު ކުރަމުންދާ ވިއްސާރައިގައި ގޯތިގެދޮރަށާއި އާއިލާތަކަށް ލިބޭ ގެއްލުން ކުޑަކޮށްދިނުމަށާއި ރައްޔިތުންނަށް އެހީތެރިކަން ފޯރުކޮށްދިނުމަށް، ސަރުކާރުން ޚާއްޞަ އިސްކަމެއް ދީގެން ރޭގަނޑާއި ދުވާލު މަސައްކަތް ކުރަމުން ގެންދާނެ ކަމުގެ ޔަގީންކަން ރައީސް މުޢިއްޒު ދިވެހި ރައްޔިތުންނަށް ދެއްވާފައިވާ ކަމަށްވެސް އެ ބަޔާނުގައި ބުނެފައިވެއެވެ.

ހުޅަނގު މޫސުމުގެ ބާރުގަދަވުމާ ގުޅިގެން މިދުވަސްވަރު މުޅި ރާއްޖޭގެ މޫސުން ވަނީ ގޯސްވެފައެވެ. މޫސުން އެންމެ ގޯސްވެފައިވަނީ ރާއްޖޭގެ އުތުރުގެ ރަށްތަކަށެވެ. މޯލްޑިވްސް މީޓިއޮރޮލޮޖިކަލް ސަރވިސް (މެޓް) އިން އިއްޔެ ވަނީ ހަތަރު ގަޑިއިރަށް ހއ. އަތޮޅުން ފެށިގެން ށ. އަތޮޅަށް އޮރެންޖު އެލާޓް ނެރެފައެވެ. އަދި އެ ސަރަޙައްދުގެ ބައެއް ރަށްތަކުގައި ވަރަށް ބޮޑަށް ފެންބޮޑުވެގެން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އަށް ރިޕޯޓު ކޮށްފައިވާކަންވެސް ފާހަގަކުރެވެއެވެ.

މި ގޯސް މޫސުމާ ގުޅިގެން ރައްޔިތުންގެ ސަލާމަތާއި ރައްކާތެރިކަމަށް އިސްކަންދީ، ކަމާބެހޭ އިދާރާތަކުން ދޭ އިރުޝާދުތަކަށް ފުރިހަމައަށް ތަބާވުމަށް ސަރުކާރުން ވަނީ އާންމުންނަށް އިލްތިމާސް ކޮށްފައެވެ. އަދި މޫސުން ގޯސްވެފައިވާ ސަރަޙައްދުތަކުގައި ދިރިއުޅޭ ރައްޔިތުން ވީހާވެސް ގޭގައި މަޑުކުރުމަށާއި، ކޮންމެހެން ބޭނުން ނޫން ހާލަތްތަކުގައި މަގުމައްޗަށް ނުނިކުތުމަށް އިރުޝާދު ދީފައިވެއެވެ. މީގެއިތުރުން، އެއްވެސް ކުއްލި ނުރައްކަލެއް ކުރިމަތިވެއްޖެނަމަ ވަގުތުން ކަމާބެހޭ އިދާރާތަކަށް އެންގުމަށްވެސް ސަރުކާރުން ވަނީ އާންމުންނަށް އިލްތިމާސް ކޮށްފައެވެ.