މިއަދުވެސް މެދު ރާއްޖެތެރޭގެ ބައެއް އަތޮޅުތަކަށް އޮރެންޖު ސަމާލު ނެރެފި

މޫސުމާބެހޭ ޤައުމީ އިދާރާއިން މިއަދު ހަވީރު 6:15 އާ ހަމައަށް ކ. އަތޮޅުން ފެށިގެން އދ. އަތޮޅާ ހަމައަށް ހުރި ސަރަހައްދުތަކަށް އޮރެންޖު ސަމާލު ނެރެފިއެވެ.  

މި އެލާޓުގައި އެ ސަރަހައްދުތަކަށް ގުގުރުމާއެކު ބޯކޮށް ވާރޭވެހި، ފެންބޮޑުވުމުގެ ފުރުސަތު އޮތްކަމަށް އިންޒާރު ދީފައިވެއެވެ. އަދި ހަމައެއާއެކު، ރާއްޖޭގެ އުތުރު އަތޮޅުތަކަށް ވާރޭވެހި، ވައިގަދަވެ، ކަނޑު ގަދަވުމުގެ ފުރުސަތު އޮތްކަމަށް ބުނެ ޔެލޯ އެލާޓެއްވެސް ނެރެފައިވެއެވެ.

މި ވިއްސާރައިގެ ސަބަބުން މާލޭގެ މަގުތަކުގައި ފެންބޮޑުވެ، ރައްޔިތުން ދަތިހާލުގައި ޖެހުމާ ގުޅިގެން، އެމް.އެން.ޑީ.އެފްގެ ސިފައިން ވަނީ މަގުތަކަށް ނިކުމެ، ފެންހިންދުމާއި ރައްޔިތުންނަށް އެހީތެރިކަން ފޯރުކޮށްދިނުމުގެ މަސައްކަތުގައި ހަރަކާތްތެރިވެފައެވެ. އަދި އަތޮޅުތެރޭގެ ރަށްރަށުގައިވެސް ފުލުހުން ދަނީ މިފަދަ އެހީތެރިކަން ފޯރުކޮށްދެމުންނެވެ.

މެޓް އޮފީހުން ލަފާކޮށްފައިވާ ގޮތުގައި، ކުރިއަށް އޮތް ފަސް ދުވަހު ވެސް ރާއްޖޭގެ ބޮޑު ބަޔަކަށް ވިއްސާކޮށް، ވަރަށް ވައިގަދަވާނެ އެވެ. އުތުރާއި މެދު ރާއްޖެ ތެރޭގެ ރަށްތަކަށް ވައިޖެހެނީ 17 މޭލާއި 27 މޭލާ ދެމެދުގެ ބާރުމިނުގަ އެވެ. އަދި ދެކުނުގެ ރަށްތަކަށް ވައިޖެހޭނީ ގަޑިއަކު 13 މޭލާއި 23 މޭލާ ދެމެދުގެ ބާރުމިނުގަ އެވެ. އަދި ވިލާގަނޑުގައި ގަޑިއަކު 60 މޭލަށް ވައިގަދަވުން އެކަށީގެންވެ އެވެ.

ރާއްޖޭގެ ހުރިހާ ސަރަހައްދެއްގެ ކަނޑުތައް ވެސް ގަދަވެ، ވިލާގަނޑުގައި ވަރަށް ގަދަވާނެ ކަމަށް ލަފާކުރެވެ އެވެ. ދިޔަވަރު ބޮޑުވާ ވަގުތުތަކުގައި ރަށްރަށަށް އުދަ އެރުން ވެސް އެކަށީގެންވެ އެވެ.

މިކަމާއި ގުޅިގެން މޫސުމާބެހޭ އިދާރާއިން ރައްޔިތުންނަށް އިލްތިމާސްކޮށްފައިވަނީ މި ނުރައްކާތެރި މޫސުމުގައި ރައްކާތެރިކަމުގެ ފިޔަވަޅުތައް އަޅައި، ކަނޑު ދަތުރުފަތުރު ކުރުމުގައި ފަރުވާތެރިވުމަށެވެ.