ޚަރިޖީ ވަޒީރު ބަހްރައިންގެ ބޮޑުވަޒީރާއި ބައްދަލުކުރައްވައިފި

ދިވެހިރާއްޖޭގެ ޚާރިޖީ ވަޒީރު، އަލްފާޟިލް މޫސާ ޒަމީރު، ބަޙްރައިންގެ ވަލީއަހުދު އަދި ބޮޑުވަޒީރު، ޝައިޚް ސަލްމާން ބިން ހަމަދު އަލް ޚަލީފާއާ ރަސްމީ ބައްދަލުވުމެއް ބާއްވައިފިއެވެ.

މި ބައްދަލުވުން ބޭއްވުނީ ޚާރިޖީ ވަޒީރު މިހާރު ބަޙްރައިންއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ. މި ބައްދަލުވުމުގައި، ޚާރިޖީ ވަޒީރު ވަނީ ބަޙްރައިންގެ ރަސްގެފާނު، ޝައިޚް ހަމަދު ބިން އީސާ އަލް ޚަލީފާއަށް އެޑްރެސްކޮށް، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ޚާއްޞަ ސިޓީފުޅެއް ބޮޑުވަޒީރަށް އަރުވާފައެވެ.

މި ބައްދަލުވުމުގައި ދެ ޤައުމުގެ ދެމެދުގައި އޮތް ދިގު މުއްދަތުގެ ގުޅުން އިތުރަށް ހަރުދަނާކުރުމާއި، އިޤްތިޞާދީ އަދި އިޖްތިމާޢީ ދާއިރާތަކުން އެއްބާރުލުން އިތުރުކުރެވިދާނެ ގޮތްތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. އަދި ޚާރިޖީ ވަޒީރު ވަނީ ބަޙްރައިންއާއެކު އޮތް ޚާއްޞަ ގުޅުން ދެމެހެއްޓުމަށް ދިވެހި ސަރުކާރުން ދެއްވާ އިސްކަމުގެ ޔަޤީންކަން އާކޮށްދެއްވާފައެވެ.

ޚާރިޖީ ވަޒީރުގެ މި ދަތުރުފުޅަކީ ބަޙްރައިންގެ ޚާރިޖީ ވަޒީރު ޑރ. އަބްދުއްލަޠީފް ބިން ރާޝިދު އަލް ޒަޔާނީގެ ދަޢުވަތަކަށް ކުރައްވާ ރަސްމީ ދަތުރުފުޅެކެވެ. މި ދަތުރުފުޅުގައި ދެ ޤައުމުގެ ގުޅުން އިތުރަށް ހަރުދަނާކުރުމާ ގުޅޭގޮތުން ތަފާތު ފަންތީގެ މަޝްވަރާތައް ކުރިއަށްދާނެ ކަމަށް ޚާރިޖީ ވުޒާރާއިން މަޢުލޫމާތު ދެއްވާފައިވެއެވެ.

މި މަހުގެ 15 ވަނަ ދުވަހާ ހަމައަށް ދެމިގެންދާ، ޚާރިޖީ ވަޒީރުގެ ބަޙްރައިނަށް ކުރައްވާ ދަތުރުފުޅުގައި، އެމްބެސެޑަރ އެޓް ލަރޖް އަޙްމަދު ނަސީރު އަދި ބައިލެޓަރަލް ސެކްރެޓަރީ ޑރ. ހާލާ ޙަމީދު ހިމެނޭ ގޮތަށް، ޚާރިޖީ ވުޒާރާގެ އިސް ވަފުދެއް ބައިވެރިވެ ވަޑައިގަންނަވައެވެ.

ދިވެހިރާއްޖެއާއި ބަޙްރައިނު ދެ ޤައުމުގެ ދެމެދުގައި ސިޔާސީ ގުޅުން ޤާއިމުކުރެވުނުތާ މިއަހަރާއެކު 44 އަހަރު ފުރިހަމަވާނެއެވެ.