ޕެރިސް އޮލިމްޕިކްސް 2024 ނިމުމަކަށް

2024 އޮލިމްޕިކްސްގެ ނިންމުމުގެ ރަސްމިއްޔާތުގައި ކުޅިވަރާއި، ސްކްރީނާއި އަދި މިއުޒިކްގެ ތަރިން އެއްވެ، 33 ވަނަ އޮލިމްޕިކް ގޭމްސް ނިންމާލައިފިއެވެ.

2028 ވަނަ އަހަރު އެމެރިކާގެ ލޮސް އެންޖެލެސްގައި ބޭއްވުމަށް ހަމަޖެހިފައިވާ އޮލިމްޕިކްސްގެ ދިދަ ހަވާލުކުރުމުގެ ގޮތުން، ދުނިޔޭގެ މަޝްހޫރު އެކްޓަރ ޓޮމް ކްރޫޒް ވަނީ ސްޓޭޑް ޑި ފްރާންސްގެ ފުރާޅުން ތިރިއަށް ފައިބައި، އޮލިމްޕިކް ދިދަ ހިފައިގެން މޮޓޯސައިކަލެއްގައި ދަތުރުކޮށްފައެވެ. މިއީ މި ރަސްމިއްޔާތުގެ އެންމެ ފާހަގަކޮށްލެވުނު މަންޒަރުތަކުގެ ތެރެއިން އެއް މަންޒަރެވެ.

ނިންމުމުގެ ރަސްމިއްޔާތު އިތުރަށް ފުރިހަމަކުރުމުގެ ގޮތުން، ވެނިސް ބީޗްގައި ރެޑް ހޮޓް ޗިލި ޕެޕާޒް، ބިލީ އައިލިޝް، ސްނޫޕް ޑޮގް އަދި ޑރ. ޑްރޭ ފަދަ ބައިނަލްއަޤްވާމީ ފެންވަރުގެ މިއުޒިކް ތަރިން ވަނީ ޚާއްޞަ ޕަރފޯމަންސްތަކެއް ހުށަހަޅާފައެވެ.

މީގެ އިތުރުން، ޕެރިސްގެ ސްޓޭޑިއަމްގައި ބޭއްވުނު ރަސްމިއްޔާތުގައި ގްރޭޓް ބްރިޓަންގެ ދިދަ ހިފައިގެން ދިޔައީ ރަން މެޑަލް ހާސިލުކުރި އެލެކްސް ޔީ އާއި ބްރައޮނީ ޕޭޖްއެވެ. ޔީ ވަނީ ފިރިހެނުންގެ ޓްރައެތްލޮންގައި ހައިރާންކުރުވަނިވި ގޮތަކަށް ކާމިޔާބު ހޯދާފައެވެ. އަދި ޕޭޖް ވަނީ ބްރިޓަންއިން ފުރަތަމަ ފަހަރަށް ޓްރެމްޕޮލިންގެ ރަން މެޑަލް ހޯދުމުގެ ޝަރަފު ހާސިލުކޮށްފައެވެ.

މިއޮލިންޕިކްސްގައި ބްރިޓަން ވަނީ މެޑަލް ތާވަލުގައި 7 ވަނައަށް އައިސް، 14 ރަން، 22 ރިހި އަދި 29 ލޯ މެޑަލް ހާސިލުކޮށްފައެވެ. ޖުމްލަ 65 މެޑަލް ހޯދައި، ޓޯކިޔޯ 2020 ގައި ހޯދި 64 މެޑަލަށްވުރެ އެއް މެޑަލް އިތުރުކޮށްފައިވެއެވެ.

އިންޓަނޭޝަނަލް އޮލިމްޕިކް ކޮމިޓީ (އައިއޯސީ) ގެ ރައީސް ތޯމަސް ބާކް ވަނީ ނިންމުމުގެ ތަޤްރީރުގައި މި އޮލިމްޕިކްސްއަކީ "ސެންސޭޝަނަލް" އޮލިމްޕިކްސްއެއް ކަމުގައި ބުނެފައެވެ.

2024 ގެ ޕެރަލިމްޕިކްސް ބޭއްވުމަށް ހަމަޖެހިފައިވަނީ އޯގަސްޓް 28 އިން ސެޕްޓެމްބަރ 8 ކަށްއަށް ފްރާންސްގެ ވެރިރަށް ޕެރިސްގައެވެ.