ޕާކިން ޒޯނެއް ހެދުމަށް މާފަންނު ސަހަރާ ހުސްކޮށްދޭނެ ބަޔަކު ހޯދަނީ

މާފަންނު ސަހަރާ

މާލެ ސިޓީ ކައުންސިލުން މާފަންނު ސަހަރާ ހުސްކޮށްދޭނެ ފަރާތެއް ހޯދުމަށް އިޢުލާންކޮށްފިއެވެ.

މާލެ ސިޓީ ކައުންސިލުން ބުނީ މާލެއަށް ދިމާވެފައިވާ ޕާކިންގެ މައްސަލަތައް ހައްލުކުރުމަށްޓަކައި، ދީނީގޮތުން އޮންނަ ހަމައާއި އުޞޫލުގެ ދަށުން މާލޭގައިހުރި ސަހަރާތައް ހުސްކޮށްގެން އެތަންތަނުގައި ޕާކިން ޒޯންތައް ތަރައްޤީކުރުމަށް ނިންމާފައިވާ ކަމަށެވެ.

ކައުންސިލުން ކުރި އިޢުލާނުގައި ބުނެފައިވަނީ 36،153 އަކަފޫޓުގެ މާފަންނު ސަހަރާ، އިސްލާމީ ކަންތައްތަކާބެހޭ ވުޒާރާގެ އުޞޫލާ އެއްގޮތަށް ހުސްކުރަން ބޭނުންވާ ކަމަށާއި، އަދި މި މަސައްކަތް އަމިއްލަ ތަކެތީގައި ކުރާނެ ފަރާތެއް ހޯދުމަށް ބީލަން ހުށައެޅުމަށް ހުޅުވާލާފައިވާކަމަށެވެ.

މި މަސައްކަތަށް ޝައުޤުވެރިވާ ފަރާތްތަކަށް މި މަހުގެ 14 ވަނަ ދުވަހުގެ 11:00 ގައި މަޢުލޫމާތު ސާފުކުރެވޭނެ ކަމަށާއި، ބިޑު ހުށައެޅުން އޮންނާނީ މި މަހުގެ 20 ވަނަ ދުވަހުގެ 11:00 ގައި ކަމަށް އިޢުލާނުގައި ބުނެފައިވެއެވެ.

މީގެ ކުރިން މާލެ ސިޓީގެ މޭޔަރ އާދަމް ޢާޒިމް ވިދާޅުވެފައިވަނީ ޕާކިން ޒޯން ތަރައްޤީކުރުމަށް އެންމެ ފުރަތަމަ ހުސްކުރާނީ މާފަންނު ސަހަރާ ކަމަށެވެ. އަދި ޕާކިންގ ޢިމާރާތްތަކުގެ މަސައްކަތް އަވަސްކުރުމަށް ކައުންސިލުން ކޮށްދެވެން ހުރި ހުރިހާ ކަމެއް ކުރާނެ ކަމަށްވެސް އޭނާ ވިދާޅުވެފައިވެއެވެ.

މާލެއަށް ދިމާވެފައިވާ ޕާކިންގެ މައްސަލަ ހައްލުކޮށްދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުގެ ތެރޭގައި ހިމެނޭ މުހިއްމު އެއްކަންތަކެވެ.

މާލޭ ސިޓީ