މާލޭގައި ފޭރުމުގެ ދެ މައްސަލައެއްގައި ހަތަރު މީހުން ހައްޔަރުކޮށްފި

މާލޭގައި މިއަދު ހިނގި ފޭރުމުގެ ދެ މައްސަލައެއްގައި ޖުމްލަ ހަތަރު މީހުން ހައްޔަރުކޮށްފައިވާ ކަމަށް ދިވެހި ފުލުހުން ބުނެފިއެވެ.

ފުރަތަމަ މައްސަލައިގައި، މިއަދު ހެނދުނު ސޯސަންމަގުން ސައިކަލެއްގައި ދުއްވަމުން ދިޔަ ދެ ފިރިހެނަކު ބިދޭސީއެއްގެ އަތުން ވޮލެޓެއް ފޭރިގަތް ކަމަށް ފުލުހުން މައުލޫމާތު ދީފައިވެއެވެ. މި މައްސަލައިގައި ހައްޔަރުކުރެވުނީ ސ. މަރަދޫ ސަލްޓަންވިލާގެ ދެބެއްކަމަށްވާ މުހައްމަދު ރިމާހު އާއި އިބްރާހިމް ޝުޖާއު އެވެ.

ފުލުހުން ބުނިގޮތުގައި މަގުމަތި ޕެޓްރޯލް ކުރަމުންދިޔަ ފުލުހުންނަށް މައުލޫމާތު ލިބުމާ ގުޅިގެން ސައިކަލު ފަހަތުން ގޮސް އެ ދެމީހުން ހައްޔަރުކުރީއެވެ. ފުރަތަމަ ހައްޔަރުކުރެވުނީ ސައިކަލު ދުއްވި މީހާ ކަމަށާއި، ފަހަތުގައި އިން މީހާ ކައިރީގައި ހުރި ގެއަކަށް ވަދެ ފިލަން އުޅުނު ނަމަވެސް އޭނާވެސް ހައްޔަރުކުރެވުނު ކަމަށް ފުލުހުން ބުނެފައިވެއެވެ.  ހައްޔަރުކުރެވުނު ދެވަނަ މީހާގެ އަތުން ފޭރިގަތް ވޮލެޓް ފެނުނު ކަމަށާއި، އޭގައި ހުރި ބޭރު ފައިސާ އާއި ދިވެހި ފައިސާ ވެރިފަރާތާ ހަވާލުކޮށްފައިވާ ކަމަށްވެސް ފުލުހުން މައުލޫމާތުދެއެވެ.

ދެވަނަ މައްސަލައިގައި، ރަސްފަންނުގައި މޫދަށް އެރި އުޅުނު ބައެއްގެ އަތްދަބަސް ވަގަށް ނެގި ދެ މީހަކު ހައްޔަރުކޮށްފައިވާ ކަމަށް ފުލުހުން ބުނެއެވެ. މޫދު ކައިރީގައި ބާއްވާފައި އޮތް ދަބަސް ގެއްލުމާ ގުޅިގެން ސީސީޓީވީ ފުޓޭޖު ބަލައި އެ ދަބަސް ވަގަށް ނެގި ދެ މީހުން ދެނެގަނެވުނު ކަމަށާއި، ގަޑިއިރެއްހާއިރު ފަހުން މަޖީދީމަގުން އެ މީހުން ހޯދައި ދަބަހާ އެކު ހައްޔަރުކުރެވުނު ކަމަށް ފުލުހުން މައުލޫމާތު ދީފައިވެއެވެ.

މާލޭގައި ފޭރުމާއި ވައްކަމުގެ މައްސަލަ އިތުރުވެފައިވާ އިރު ދިވެހި ފުލުހުން ގެންދަނީ މާލެތެރެ ބެވެލެހެއްޓުމުގެ ކަންތައްތައް އިތުރަށް ހަރުދަނާކޮށް ކުށްކުރާ ފަރާތްތައް ހައްޔަރުކުރަމުންނެވެ.