އިންޑިއާގެ އެކްސްޓަރނަލް އެފެއާޒް މިނިސްޓަރު ރާއްޖެ ވަޑައިގެންފި

ޖައިޝަންކަރާއި ރާއްޖޭގެ ފޮރިން މިނިސްޓަރު ޒަމީރު / ފޮޓޯ:ފޮރިން މިނިސްޓްރީ

އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު ރަސްމީ ދަތުރުފުޅެއްގައި ރާއްޖެ ވަޑައިގެންފިއެވެ.

އެމަނިކުފާނަށް ވެލާނާ އިންޓަނޭޝަނަލް އެއާޕޯޓުން ރަތްދޫލައިގެ މަރުހަބާއެއް ކިޔާފައިވާއިރު، އިސްވެ މަރުހަބާ ދެންނެވީ ރާއްޖޭގެ ފޮރިން މިނިސްޓަރު މޫސާ ޒަމީރެވެ.

މިއީ ޖައިޝަންކަރު ރާއްޖެ ވަޑައިގެންނެވި ހަތަރުވަނަ ފަހަރެވެ. އަދި ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން އިންޑިއާގެ ސަރުކާރުގެ އިސް ވަޒީރަކު ރާއްޖެއަށް ކުރައްވާ ފުރަތަމަ ރަސްމީ ދަތުރުފުޅެވެ.

މި ދަތުރުގައި ޖައިޝަންކަރު ރައީސް މުއިއްޒާއި ފޮރިން މިނިސްޓަރު މޫސާ ޒަމީރާ އެކު މަޝްވަރާތައް ކުރައްވާނެއެވެ. އަދި އިންޑިއާގެ ލޯނު އެހީގައި ކުރިއަށް ގެންދާ ތިލަފުށި-މާލެ ބްރިޖްގެ މަޝްރޫއުގެ މަސައްކަތްތައް ބައްލަވައިލައްވާނެއެވެ.

އޭގެ އިތުރުން، އިންޑިއާގެ އެހީގައި އައްޑޫގައި ކުރިއަށް ގެންދާ މަޝްރޫއުތަކުގެ މަސައްކަތްތައް ބައްލަވާލެއްވުމަށް އައްޑޫއަށް ވެސް ޖައިޝަންކަރު ވަޑައިގަންނަވާނެއެވެ. އައްޑޫގައި އިންޑިއާގެ އެހީގައި ކުރިއަށްދާ މަޝްރޫއުތަކުގެ ތެރޭގައި މަގުތައް ހެދުމާއި ހަންކެނޑެ ބްރިޖު ހިމެނެއެވެ. އަދި އައްޑޫގައި ހެދި ފުލުހުންގެ ކޮލެޖަކީ ވެސް އިންޑިއާގެ އެހީގައި ހެދި ތަނެކެވެ.

ޖައިޝަންކަރުގެ މި ދަތުރު ނިންމަވާލެއްވުމަށް ފަހު އޭނާ އެނބުރި އިންޑިއާއަށް ފުރާވަޑައިގެންނެވުމަށްވެސް ހަމަޖެހިފައި ވަނީ އައްޑޫމަގުންނެވެ.

އިންޑިޔާ މޫސާ ޒަމީރު