އާއިލީ ވެއްޓެއްގައި އުފާވެރިކަމާއެކު ދިރިއުޅުމަކީ ކޮންމެ މީހެއްގެ ވެސް އަސާސީ ހައްޤެއް: ޚުޠުބާ

އާއިލީ ވެއްޓެއްގައި އުފާވެރިކަމާއެކު ދިރިއުޅުމަކީ ކޮންމެ މީހެއްގެ ވެސް އަސާސީ ހައްގެއްކަމަށް މިއަދުގެ ހުކުރު ޚުޠުބާގައި ބުނެފިއެވެ.

މިއަދުގެ ހުކުރު ޚުތުބާގައި އާއިލީ ގުޅުން ދެމެހެއްޓުމުގެ މުހިންމުކަމާއި، އެކަމަށް އިސްލާމްދީން ދޭ އަހަންމިއްޔަތުކަން ފާހަގަކުރެވުނެވެ. އެގޮތުން ސަރުކާރުގެ ބެލުމުގެ ދަށުގައި ގިނަ ބަޔަކު ތިބުމަކީ ކަންބޮޑުވާންޖެހޭ ކަމެއްގެ ގޮތުގައި ޚުތުބާގައި ފާހަގަކުރެވުނެވެ. ޚާއްސަކޮށް އުމުރުން ދުވަސްވީ މީހުންނާއި، ޚާއްސަ އެހީއަށް ބޭނުންވާ ފަރާތްތަކާއި، ނަފުސާނީ ދަތިތައް ހުންނަ މީހުން އާއިލާގެ އަޅާލުމުން ދުރުގައި ތިބުމަކީ އެ ފަރާތްތަކުގެ ނަފުސާނީ ދުޅަހެޔޮކަމަށް އިތުރު ގޮންޖެހުންތަކެއް ކުރިމަތިކުރުވާނެ ކަމެއްކަމަށް ބުނެވުނެވެ.

އާއިލާގެ މުހިންމު މަސްއޫލިއްޔަތުތަކުގެ ތެރޭގައި މާތްﷲގެ ޝިއާރުތައް މަތިވެރިކޮށް، މުޖުތަމައު ހިމާޔަތްކޮށް ދިފާއުކުރާނެ ފަރާތްތައް ތަރުބިއްޔަތުކުރުން ހިމެނޭކަމަށް ޚުތުބާގައި ބަޔާންކުރެވުނެވެ. މި ޒިންމާ އަދާކުރުމަށްޓަކައި އާއިލާގެ މެދުގައި އޮންނަ ގުޅުން ބަދަހިކުރުމަކީ މުހިންމު ކަމެއްކަމަށް ފާހަގަކުރެވުނެވެ.

އާއިލީ ގުޅުން ހަރުދަނާކުރުމަށް އެކަކު އަނެކަކަށް އިހްތިރާމްކުރުމާއި، އަގުވަޒަންކުރުމާއި، ބިނާކުރަނިވި ފާޑުކިޔުން ބަދަލުކުރުމުގެ މުހިންމުކަން ޚުތުބާގައި ފާހަގަކުރެވުނެވެ. އަދި ތަނަވަސްކަން ލިބިފައިވާ މީހުން ދަތި ހާލުގައި ތިބޭ އާއިލާގެ މެންބަރުންނަށް އެހީތެރިވުމަށް ގޮވާލެވުނެވެ.

މީގެއިތުރުން، އާއިލާގެ ތެރޭގައި ތައުލީމާއި އަމިއްލަ ތަރައްގީއަށް އިސްކަންދިނުމުގެ މުހިންމުކަން ޚުތުބާގައި ފާހަގަކުރެވުނެވެ. މިފަދަ ކަންކަމަކީ ދިރިއުޅުމުގައި ކާމިޔާބު ހޯދުމަށް މަގުފަހިކޮށްދޭ ކަންކަން ކަމުގައި ބަޔާންކުރެވުނެވެ.

ޚުތުބާގައި ނިންމާލެވުނީ، އިސްލާމްދީނުގައި އާއިލާއަށް ދެވިފައިވާ މަތިވެރި މަޤާމަށް އަލިއަޅުވާލައްވާފައެވެ. އާއިލީ ގުޅުން ދެމެހެއްޓުމަކީ އިސްލާމްދީނުގައި ވަރަށް ބޮޑަށް ބާރުއަޅުއްވާފައިވާ ކަމެއްކަމާއި، މުސްލިމުންގެ ހަޔާތުގައި އާއިލާގެ ދައުރު ވަރަށް މުހިންމުކަން ފާހަގަކުރެވުނެވެ. އެހެންކަމުން، އާއިލާގެ ގުޅުން ބަދަހިކޮށް، އެކަކު އަނެކަކަށް އަޅާލައި، އިސްލާމީ އުސޫލުތަކާ އެއްގޮތަށް އާއިލާ ބިނާކުރުމަށް ކޮންމެ މުސްލިމަކުވެސް މަސައްކަތްކުރަންވާނެ ކަމުގައި ބަޔާންކުރެވުނެވެ.