ޖަޕާނަށް ބިންހެލުން އައުމާއި ގުޅިގެން އާއްމުން އިމާރާތްތައް ދޫކޮށް ބޭރަށް ނިކުމެ
ޖަޕާނުގެ ދެކުނުގައި އޮންނަ މިއާޒާކީ ޕްރިފެކްޗަރއަށް މިއަދު ހެނދުނު ވަރަށް ބާރުގަދަ ބިންހެލުމެއް އައިސް، އެއާ ގުޅިގެން ކުޑަ ސުނާމީއެއް އަރައިފިއެވެ.
ޖަޕާނުގެ މޫސުމާބެހޭ އިދާރާއިން ބުނާ ގޮތުގައި ބިންހެލުން އައީ 6.9 މެގްނިޓިއުޑްގެ ބާރުމިނުގައެވެ. އެންމެ ފުރަތަމަ ބިންހެލުން ރިކޯޑުކުރެވުނީ 7.1 މެގްނިޓިއުޑްގައި ކަމަށްވިޔަސް، ފަހުން އެ އަދަދު ވަނީ ދަށްކޮށްފައެވެ.
ބިންހެލުމާ ގުޅިގެން އައްސޭރިފަށަށް އަރާފައިވަނީ ގާތްގަނޑަކަށް 2 ފޫޓުގެ ސުނާމީއެކެވެ. ކުރިން ލަފާކުރެވުނީ 3.3 ފޫޓުގެ ސުނާމީއެއް އަރާނެ ކަމަށެވެ. ސުނާމީއާއެކު އެ ސަރަހައްދުގެ ލޮނުގަނޑު ވެސް ފުދޭވަރަކަށް ބޮޑަށް އުފުލިގެން ގޮސްފައިވާ ކަމަށް ޖަޕާނުގެ މޫސުމާބެހޭ އިދާރާއިން މަޢުލޫމާތު ދީފައިވެއެވެ.
ބިންހެލުމުގެ އަސަރު އެންމެ ބޮޑަށް ކޮށްފައިވަނީ ނިޝިނަން ސިޓީއާއި މިޔާޒާކީ ޕްރެފެކްޗަރ ސަރަހައްދަށެވެ. ބިންހެލުން 30 ސިކުންތާއި 1 މިނެޓާ ދެމެދުގެ ވަގުތަކަށް ދެމިގެން ދިޔަ ކަމަށް އެ ސަރަހައްދުގެ ރައްޔިތުން ބުނެފައިވެއެވެ.
ބިންހެލުމާ ގުޅިގެން ތިން މީހަކަށް އަނިޔާވެފައިވާ ކަމަށް ރިޕޯޓުތަކުގައި ބުނެފައިވީ ނަމަވެސް، އެ މީހުންނަށް ލިބުނު އަނިޔާގެ ތަފްސީލު އަދި ލިބިފައެއް ނުވެއެވެ. އަދި މި ބިންހެލުމާއި ސުނާމީއާ ގުޅިގެން މާބޮޑު ގެއްލުމެއް ލިބިފައިނުވާ ކަމަށް ޖަޕާނުގެ ޕަބްލިކް ބްރޯޑްކާސްޓަރު އެންއެޗްކޭއިން ބުނެފައިވެއެވެ.
ކޮމެންޓް