ހއ. އުލިގަމުގައި ގާއިމްކުރާ ޕޯޓް ފެސިލިޓީއަށް މުވައްޒަފުން ހޯދަން ފަށައިފި

ބަންކަރިން ޚިދުމަތް ފެށުމަށް ސޮއިކުރުމުގެ ރަސްމިއްޔާތު / ފޮޓޯ:އެމްޕީއެލް

އިހަވަންދިއްޕޮޅުގައި ފަށާ ބަންކަރިން ޚިދުމަތުގައި ހއ. އުލިގަމުގައި ގާއިމްކުރަން ނިންމާފައިވާ ޕޯޓް ފެސިލިޓީއަށް މުވައްޒަފުން ހޯދަން އެމްޕީއެލްއިން މިއަދު އިޢުލާންކޮށްފިއެވެ.

އެމްޕީއެލްއިން މިއަދު ކުރި އިޢުލާނުގައި ވަނީ ޖުމްލަ ހަތް މުވައްޒަފަކު ހޯދަން ބޭނުންވާކަމަށެވެ. މީގެ ތެރޭގައި ހިމެނެނީ އެސިސްޓަންޓް އެޑްމިނިސްޓްރޭޓިވް އެސޯސިއޭޓަކާއި ލޭބަރެއްގެ އިތުރުން ހަތަރު ސެކިއުރިޓީ އެސިސްޓެންޓުންނެވެ.

އިހަވަންދިއްޕޮޅުގައި އިންޓަނޭޝަނަލް ބަންކަރިން ސަރވިސް އާއި މެރިޓައިމް ޚިދުމަތް ފެށުމަށް ނިންމައި، އެމްޕީއެލްއިން ވަނީ އެ މަސައްކަތް ފަށައިފައެވެ. މީގެ އިތުރުން، ބޭރުގެ ޔޮޓުތައް ގިނަ އަދަދަކަށް އަންނަ އުލިގަމުގައި ޔޮޓް މެރީނާއެއް ހެދުމަށް ވެސް ނިންމައި، އެ މަސައްކަތް ބިޑަށް ހުޅުވާލައިފައިވެއެވެ.

މި ޚިދުމަތްތައް ދިނުމަށް ބޭނުންވާ އޮފީސްތައް ހެދުމުގެ މަސައްކަތް ވެސް އެމްޕީއެލްއިން މިހާރު ދަނީ ކުރަމުންނެވެ. އަދި މިދިޔަ ހަފްތާގައި ވަނީ ޚިދުމަތަށް ބޭނުންވާ ބައެއް އުޅަނދުތައް ވެސް ގެނެސްފައެވެ.

އުލިގަމުގައި މި ޕޯޓް ފެސިލިޓީ ގާއިމްކުރުމުން، އިހަވަންދިއްޕޮޅަށް އިތުރު ވަޒީފާގެ ފުރުސަތުތަކެއް ހުޅުވިގެންދާނެ ކަމަށް ބެލެވެއެވެ. އަދި މި ސަރަހައްދުގެ އިގްތިސާދީ ހަރަކާތްތައް އިތުރުވެ، ރަށުގެ ތަރައްގީއަށް ވެސް މަގުފަހިވެގެންދާނެ ކަމަށް އުއްމީދު ކުރެވެއެވެ.

އެމްޕީއެލް