އިންޑިއާގެ ޚާރިޖީ ވަޒީރު ޖައިޝަންކަރު މާދަމާ ރާއްޖެ ވަޑައިގަންނަވާނެ

އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު ރަސްމީ ދަތުރުފުޅެއްގައި މާދަމާ ރާއްޖެއަށް ވަޑައިގަންނަވާނެއެވެ.

ޖައިޝަންކަރު މިކުރައްވާ ދަތުރުފުޅުގެ ތެރޭގައި އިންޑިއާގެ އެހީގައި ކުރިއަށްދާ ތިލަމާލެ ބްރިޖްގެ މަސައްކަތް ބައްލަވާލައްވާނެ އެވެ. އަދި އައްޑޫ ސިޓީއަށް ވަޑައިގެން އިންޑިއާގެ އެހީގައި އެ ސިޓީގައި ހިނގަމުންދާ އެކި މަޝްރޫއުތަކުގެ މަސައްކަތްތައް ވެސް ބައްލަވާލައްވާނެއެވެ. މީގެ ތެރޭގައި އައްޑޫ ސިޓީގެ މަގުތައް ހެދުމުގެ މަޝްރޫއާއި ފުލުހުންގެ ކޮލެޖު ހިމެނެއެވެ.

ޖައިޝަންކަރުގެ މި ދަތުރުފުޅުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ފޮރިން މިނިސްޓަރު މޫސާ ޒަމީރާ ބައްދަލުކުރައްވައި މަޝްވަރާކުރައްވާނެ އެވެ.

އިންޑިއާގެ އެކްސްޓާނަލް އެފެއާޒް މިނިސްޓަރު ރަސްމީ ދަތުރުފުޅެއްގައި މާދަމާ ރާއްޖެއަށް ވަޑައިގަންނަވާއިރު، ރައީސުލްޖުމުހޫރިއްޔާ ޑރ.މުހައްމަދު މުއިއްޒާއި ފޮރިން މިނިސްޓަރު ޒަމީރު ވެސް ދާދިފަހުން ވަނީ އިންޑިއާއަށް ވަޑައިގެން ޖައިޝަންކަރާ ބައްދަލު ކުރައްވާފައެވެ.

މި ސަރުކާރު ވެރިކަމަށް އައުމަށް ފަހު އަވަށްޓެރި އިންޑިއާ އާއި ގުޅުން ގޯސްވެފައި ވީނަމަވެސް މި ފަހަކަށް އައިސް މި ގުޅުން ވަރަށް ބޮޑުތަނުން ރަނގަޅުވަމުން އަންނަކަން ފާހަގަކުރެވެއެވެ. އެގޮތުން ޖައިޝަންކަރުގެ  މާދަމާގެ މި ދަތުރުފުޅަކީ ރައީސް މުއިއްޒު ވެރިކަމާ ހަވާލުވެވަޑައިގެންނެވި ފަހުން އިންޑިއާ ސަރުކާރުގެ އިސް ވަޒީރަކު ރާއްޖެއަށް ރަސްމީ ދަތުރުފުޅެއް ކުރައްވާ ފުރަތަމަ ފަހަރެވެ.

ޖައިޝަންކަރު ރާއްޖެއަށް ކުރައްވާ 4 ވަނަ ދަތުރުފުޅުގެ ގޮތުގައި ހިމެނޭ މާދަމާގެ ދަތުރުފުޅު ނިންމަވާލައްވާނީ އައްޑޫ ސިޓީއިންނެވެ.