81.5 މިލިއަން ޕައުންޑުގެ އެއްބަސްވުމަކާއެކު އަލްވަރެޒް އެޓްލެޓިކޯއަށް

މެންޗެސްޓަރ ސިޓީގެ ފޯވަޑް ޖޫލިއަން އަލްވަރެޒް ސޮއިކުރުމަށް އެޓްލެޓިކޯ މެޑްރިޑްއިން 81.5 މިލިއަން ޕައުންޑުގެ އެއްބަސްވުމަކަށް އާދެވިއްޖެއެވެ. މި އަގުގެ ތެރޭގައި ހިމެނެނީ އިބްތިދާއީ ގޮތުން 64.4 މިލިއަން ޕައުންޑާއި އިތުރު 17.1 މިލިއަން ޕައުންޑުގެ އެޑް-އޮންސްއެވެ.

މިއީ މެންޗެސްޓަރ ސިޓީގެ ތާރީޚުގައި އެންމެ ބޮޑު އަގެއްގައި ކުޅުންތެރިއަކު ވިއްކާލި ރެކޯޑު އަގެވެ. މީގެ ކުރިން މި ރެކޯޑު އޮތީ 2022 ވަނަ އަހަރު ރަހީމް ސްޓަރލިންގް ޗެލްސީއަށް 50 މިލިއަން ޕައުންޑަށް ވިއްކާލުމުންނެވެ.

އަލްވަރެޒް ވަނީ އޭނާގެ މުސްތަޤުބަލާ މެދު ނިންމުމެއް ނިންމާނީ 2024 ވަނަ އަހަރުގެ އޮލިމްޕިކްސްގައި އާޖެންޓީނާގެ ބައިވެރިވުން ނިމުމުން ކަމަށް ބުނެފައެވެ. އާޖެންޓީނާ ޓީމު މިދިޔަ ހުކުރު ދުވަހު ވަނީ ފްރާންސްއާ ދެކޮޅަށް ކުޅުނު މެޗުން ބަލިވެ މުބާރާތުން ވަކިވެފައެވެ.

މެންޗެސްޓަރ ސިޓީގެ މެނޭޖަރ ޕެޕް ގުއާޑިއޯލާ ވަނީ 24 އަހަރުގެ މި ކުޅުންތެރިޔާ ހިފަހައްޓަން ބޭނުންވާ ކަމަށް ބުނެފައެވެ. އަދި އޯގަސްޓް މަހުގެ ކުރީކޮޅު ސީޒަން ފެށުމުގެ ކުރިން އޭނާ އަލްވަރެޒްއަށް "ބަރޯސާވާ" ކަމަށް ބުނެފައިވެއެވެ.

ނަމަވެސް، އިލްކޭ ގުންޑޯގަން، ރިޔާޑް މަހްރޭޒް އަދި އޭމެރިކް ލަޕޯޓް ފަދަ ކުޅުންތެރިންނާ މެދު ކުރިން ޢަމަލުކުރި ފަދައިން، ދާން ބޭނުންވާ ކުޅުންތެރިއަކަށް ސިޓީއިން ހުރަސް ނާޅާނެ ކަމަށް ވެއެވެ.

އެޓްލެޓިކޯ މެޑްރިޑްއިން ވަނީ ޗެލްސީގެ މިޑްފީލްޑަރ ކޮނަރ ގެލަގަރ ސޮއިކުރުމަށްވެސް އެއްބަސްވެފައެވެ. ނަމަވެސް އަލްވަރެޒްއާއެކު އަމިއްލަ ޝަރުތުތަކަށް އަދި އެއްބަސްވެވިފައެއް ނުވެއެވެ.