ޗައިނާ ސަރުކާރުން ދިވެހި ދަނޑުވެރިންނަށް ޒަމާނީ މެޝިނަރީސް އާއި ޓެސްޓިންގ ކިޓްސް ހަދިޔާކޮށްފި

ޗައިނާ ސަރުކާރުން ދިވެހި ދަނޑުވެރިންނަށް ޒަމާނީ މެޝިނަރީއާއި ޓެސްޓިންގ ކިޓްތަކެއް ހަދިޔާކޮށްފިއެވެ

ޗައިނާގެ ސިޗުއާން ޕްރޮވިންސްގެ ދަނޑުވެރިކަމާއި ގްރާމީ ކަންކަމާބެހޭ އިދާރާއިން ވަނީ ރާއްޖޭގެ ދަނޑުވެރިކަމުގެ ދާއިރާއަށް އަގުހުރި ހަދިޔާއެއް ފޯރުކޮށްދީފައެވެ.

މިއަދު ބޭއްވުނު "މޯލްޑިވްސް-ސިޗުއާން ވިޔަފާރިއާއި އިންވެސްޓްމަންޓް ކޮންފަރެންސް" ގައި މި ހަދިޔާ ރަމްޒީގޮތުން ބަލައިގަތީ ދަނޑުވެރިކަމާއި މެރިން ރިސޯސަސްގެ ވަޒީރު ޑރ. އާއިޝަތު ރަމީލާއެވެ. ދަނޑުވެރިކަމާބެހޭ ވުޒާރާއިން ހާމަކުރި ގޮތުގައި މި ހަދިޔާގެ އަގަކީ 100,000 ޗައިނީސް ޔުއާން ނުވަތަ 224,754 ދިވެހި ރުފިޔާއެވެ.

މީގެއިތުރުން، ރާއްޖޭގެ ދަނޑުވެރިކަން ކުރިއެރުވުމަށްޓަކައި އެހީތެރިކަމާއި އެއްބާރުލުން ފޯރުކޮށްދިނުމާ ގުޅޭގޮތުން، ދިވެހި ސަރުކާރާއި ޗައިނާގެ ސިޗުއާން ޕްރޮވިންސްގެ ދަނޑުވެރިކަމާއި ގްރާމީ ކަންކަމާބެހޭ އިދާރާއާއި ސިޗުއާން ދަނޑުވެރިކަމުގެ ސައިންސް އެކަޑަމީއާ ދެމެދު އެއްބަސްވުމެއްގައިވެސް މިއަދު ވަނީ ސޮއިކުރެވިފައެވެ.

މި އެއްބަސްވުމުގެ ދަށުން، ޕްރޮޓެކްޓެޑް އެގްރިކަލްޗަރގެ ދާއިރާގައި މަސައްކަތްކުރާ ތަޖުރިބާކާރުންނާއި ޢިލްމުވެރިންގެ މެދުގައި މަޢުލޫމާތު ޙިއްޞާކުރުމަށް ބޭއްވޭ ތަމްރީނު ޕްރޮގްރާމްތަކާއި، މަސައްކަތު ބައްދަލުވުންތަކާއި އަދި ސެމިނަރތަކުގައި ބައިވެރިވުމުގެ ފުރުޞަތު ދިވެހިރާއްޖެއަށް ލިބިގެންދާނެއެވެ.

މީގެ އިތުރުން، ދިވެހިރާއްޖޭގެ ދަނޑުވެރިކަމުގެ ދާއިރާ ކުރިއެރުވުމަށްޓަކައި، ގުޅުންހުރި އެކި ދާއިރާތަކުން ސަރަޙައްދީ އަދި ބައިނަލްއަޤްވާމީ ފެންވަރުގައި އެހީތެރިކަމާއި އެއްބާރުލުން ފޯރުކޮށްދިނުންވެސް މި އެއްބަސްވުމުގައި ހިމެނިފައިވާކަމަށް ދަނޑުވެރިކަމާބެހޭ ވުޒާރާއިން ހާމަކުރައްވާފައިވެއެވެ.