މާލޭ ޓްރެފިކްގެ ހާލަތު ވަނީ ދިރިއުޅުމަށް އުނދަގޫވާ މިންވަރަށް ގޯސްވެފައި: މިނިސްޓަރ އަމީން

ކުރީގެ ސަރުކާރުތަކުގެ ޢަމަލުތަކުގެ ސަބަބުން، މާލެ ސަރަޙައްދުގެ ޓްރެފިކްގެ މައްސަލަ ތަހައްމަލު ނުކުރެވޭ ހިސަބަށް ގޮސްފައިވާ ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރ މުޙައްމަދު އަމީން ވިދާޅުވެއްޖެއެވެ.

ޓްވިޓަރ ގައި މިނިސްޓަރ ކުރެއްވި ޕޯސްޓެއްގައި ވިދާޅުވެފައިވަނީ ކުރީގެ ސަރުކާރުން ގަވާއިދާ ޚިލާފަށް ގަރާޖު ރަޖިސްޓަރީ ދޫކުރުމާއި ރަޖިސްޓަރީ ނުކުރާ އުޅަނދުތައް ބޭނުންކުރުމުގެ ހުއްދަ ދިނުމުގެ ސަބަބުން މާލެއާއި ހުޅުމާލޭގެ މަގުތައް ކުނިގޮނޑަކަށް ވެފައިވާކަން އެންމެންނަށްވެސް އެނގޭ ކަމަށެވެ.

މިނިސްޓަރ އަމީން އިތުރަށް ވިދާޅުވީ، މިކަމަށް ފަސޭހަ ހައްލެއް ނެތް ނަމަވެސް، ރައްޔިތުންގެ މަންފާއަށްޓަކައި ފިޔަވަޅު އަޅަންޖެހޭ ކަމަށެވެ. އަދި މިމައްސަލައަށް ހައްލެއް ހޯދުމަށް ކަމާބެހޭ ފަރާތްތަކާއި ރައްޔިތުން ގުޅިގެން މަސައްކަތްކުރާނެ ކަމަށް އުންމީދުކުރާވާހަކަވެސް ވިދާޅުވިއެވެ.

"ރައްޔިތުންގެ ފަރާތުން ލިބުނު އެއްބާރުލުމަށް ޝުކުރު ދަންނަވަން. އަދި މިމައްސަލައަށް ހައްލެއް ހޯދުމަށް ކަމާބެހޭ ފަރާތްތަކާއި ރައްޔިތުން ގުޅިގެން މަސައްކަތްކުރާނެ ކަމަށް އުންމީދުކުރަން،" މިނިސްޓަރ އަމީން ވިދާޅުވިއެވެ.

މިނިސްޓަރުގެ މި ބަސްފުޅު ވިދާޅުވެފައިވަނީ ހުޅުމާލޭ ސެންޓްރަލް ޕާކުގެ ޕާކިންގ އޭރިޔާއިން ގިނަ އަދަދެއްގެ ރޭސް ކާރުތަކެއް ޓޮއުކޮށްގެން ގެންދިޔުމަށްފަހުގައެވެ. އެ ސަރަހައްދުން ނެގިފައިވާ ފޮޓޯތަކުން ދައްކާގޮތުގައި އެތަނުގައި ހުރި ގިނަ އުޅަނދުތަކަކީ ބީ-ޒޯންގައި ރަޖިސްޓްރީކޮށްފައިވާ އުޅަނދުތަކެކެވެ. މިއީ އުތުރާއި ދެކުނުގައި ދުއްވުމަށް ހުއްދަ ދެވިފައިވާ އުޅަނދުތަކެއް ކަމަށްވެފައި، މާލެ ސަރަހައްދުގައި ދުއްވުމަށް ހުއްދަ ނެތް އުޅަނދުތަކެކެވެ.

މިނިސްޓަރ އަމީން ޓްރާންސްޕޯޓް މިނިސްޓަރުކަމާ ހަވާލުވުމަށްފަހު، އުޅަނދު ރަޖިސްޓްރީކުރުމުގެ އުސޫލުތައް ވަނީ ވަރަށް ހަރުކަށިކުރެވިފައެވެ. މިކަން މިގޮތަށް ކުރެވިފައިވަނީ މަގުމަތީގެ ސަލާމަތާއި ރައްކާތެރިކަން އިތުރުކުރުމުގެ މަޤްޞަދުގައެވެ.

ވިނަރެސް ފްލެޓް ކައިރީގައި ދާދިފަހުން ހިނގި ނުރަށްކާތެރި އެކްސިޑެންޓްގައި، ބާރު ސްޕީޑުގައި ދުއްވަމުންދިޔަ ރޭސް ކާރެއް މަގުމަތީގައި ހުއްޓާފައިހުރި މޮޓޯސައިކަލެއްގައި މީހަކު އިންދައި ޖެހުމާ ގުޅިގެން، ގިނަ ބަޔަކު ވަނީ މަގުމަތީގެ ސަލާމަތާ ގުޅޭގޮތުން ކަންބޮޑުވުން ފާޅުކުރަން ފަށާފައެވެ. މި ހާދިސާއާ ގުޅިގެން ސަރުކާރުން ވަނީ މާލެ ސަރަހައްދުގައި އުޅަނދުތަކުގެ އަދަދު މަދުކުރުމަށާއި ޓްރެފިކް ހާލަތު ބަދަލުކުރުމަށް ރޭވިފައިވާ ޕްލޭނެއް ތަޢާރަފުކޮށްފައެވެ.

މިނިސްޓަރ އަމީންގެ ބަސްފުޅުން އަދި ސަރުކާރުގެ އައު ޕްލޭނުން ދޭހަވަނީ، މާލޭގެ ޓްރެފިކް ހާލަތު ރަނގަޅުކުރުމަށް އަޅަންޖެހޭ ފިޔަވަޅުތައް އަޅަމުންދާ ނަމަވެސް، މި މައްސަލަ ހައްލުކުރުމަށް ދިގު މުއްދަތެއް ނަގާނެކަމެވެ.