ހަނިއްޔާ އަވަހާރަކޮށްލުމުން މަޝްވަރާތަކަށް އިތުރު ގޮންޖެހުމެއް - ބެން ކާޑިން

ޙަމާސްގެ ސިޔާސީ ލީޑަރު އިސްމާޢީލް ހަނިއްޔާ އީރާނުގައި އަވަހާރަވުމުން، އިސްރާއީލާއި ފަލަސްތީނުގެ އެ ޖަމާޢަތާ ދެމެދު މަޝްވަރާކުރުން އިތުރަށް އުނދަގޫވެގެންދާނެ ކަމަށް، އެމެރިކާގެ ސެނެޓުގެ ފޮރިން ރިލޭޝަންސް ކޮމިޓީގެ ޗެއަރމަން ބެން ކާޑިން ވިދާޅުވެއްޖެއެވެ.

އޭނާ މިހެން ވިދާޅުވީ ބުދަ ދުވަހު ކެޕިޓަލް ހިލްގައި ބޭއްވުނު ބައްދަލުވުމެއްގައި ނޫސްވެރިންނާ ވާހަކަފުޅު ދައްކަވަމުންނެވެ. ބެން ކާޑިން މިކަމާގުޅިގެން ނޫސް ވެރިންނާ ބައްދަލުކުރެއްވީ، މި މަރުގެ ސަބަބުން މެދު އިތުމަތީގެ ސުލްހައަށް ކުރާނެ އަސަރާ ގުޅޭގޮތުން ކޮމެންޓް ކުރުމަށް ސްޓޭޓް ޑިޕާޓްމަންޓާއި ވައިޓް ހައުސްއިން ކުރިން އިންކާރުކޮށްފައިވަނިކޮށެވެ.

ޣައްޒާގެ ހަނގުރާމަ ހުއްޓުވުމުގެ މަޝްވަރާތަކުގައި ހަނިއްޔާ ބައިވެރިވެފައިވާކަން ކާޑިން ޤަބޫލުފުޅު ކުރައްވައެވެ. އަދި ހަނިއްޔާ އަވަހާރަވުމުން "ރަހީނުން ބަދަލުކުރުމުގެ މަޝްވަރާތަކަށް މާ ބޮޑު ގޮންޖެހުމަކަށް މިވަގުތު ވެއްޖެ" ކަމަށް ކާޑިން ވިދާޅުވިއެވެ.
"މިހާރުވެސް ހޫނުވެފައިވާ ހާލަތު އިތުރަށް ހޫނުވެއްޖެ،" އޭނާ ތަފްޞީލްކޮށްދެއްވިއެވެ.

ކާޑިން ވިދާޅުވީ، ހަނިއްޔާ އަވަހާރަވުމުގެ ކުރިން އެމެރިކާއަށް އެކަމުގެ އެއްވެސް މަޢުލޫމާތެއް ލިބިފައިނުވާކަމަށެވެ. ޑިޕްލޮމެޓުންނާއި ވައިޓް ހައުސްއިން ވެސް ބުނެފައިވަނީ މި ވާހަކައެވެ.

ކާޑިން ވިދާޅުވީ، އެމެރިކާއަށް އަދި ވަކި މަޢުލޫމާތެއް ލިބިފައިނުވާތީ، ކަންތައްތައް ހިނގަމުންދާއިރު، ތަފްސީލުތަކާ ބެހޭގޮތުން ވާހަކަ ދެއްކޭކަށް ނެތް ކަމަށެވެ.

މި ހަމަލާއާ ގުޅިގެން އެމެރިކާގެ ޒިންމާއެއް އޮތްކަމަށް އީރާނުން ތުހުމަތު ކުރާއިރު، އީރާނާއި ހަމާސްއިން މި ހަމަލާގެ ތުހުމަތު އިސްރާއީލުގެ މައްޗަށް ކޮށްފައިވާއިރު، ބީބީސީން އެހި ސުވާލަކަށް ޖަވާބުދެމުން ކާޑިން ވިދާޅުވީ އީރާނުން ބުނާ އެއްޗަކީ "އެމީހުންގެ އަމިއްލަ ޕްރޮޕަގަންޑާ ނޫން އެހެން އެއްޗެއް" ކަމަށް އޭނާ ޤަބޫލުނުކުރައްވާ ކަމަށެވެ.

ކާޑިން އިތުރަށް ވިދާޅުވީ މިނިވަން ޤައުމަކަށް ކުރާ އެއްވެސް ބާވަތެއްގެ ސިފައިންގެ އޮޕަރޭޝަނެއްގައި ބައިވެރިވުމަށް އެމެރިކާ ވަރަށް ބޮޑަށް ފަސްޖެހޭނެ ކަމަށެވެ.