މާލޭގައި މާރާމާރީ ހިންގި 6 ބިދޭސީއަކު ޑީޕޯޓުކުރަން ނިންމައިފި

މިދިޔަ ބުދަ ދުވަހުގެރޭ މާލޭގައި ހިންގި މާރާމާރީއާ ގުޅިގެން ހަ ބިދޭސީއަކު ޑީޕޯޓް ކުރަން ނިންމައިފިއެވެ.

ފުލުހުން ކުރިން ވިދާޅުވި ގޮތުގައި އަސްރަފީ މަގުގައި ހިންގި އެ މާރާމާރީއާ ގުޅިގެން ދެ މީހަކަށް ފަރުވާ ދިނުމަށް އައިޖީއެމްއެޗަށް ގެންދިޔައެވެ. އެކަމަކު، އެމީހުންގެ ހާލު ގޯސް ނުވުމުން ފަރުވާ ދިނުމަށް ފަހު، ވަނީ ހޮސްޕިޓަލުން ދޫކޮށްލައިފައެވެ.

އެ މައްސަލައިގައި ފަސް މީހަކު ވަނީ ހައްޔަރުކޮށްފައެވެ.

އިމިގްރޭޝަނުން ވިދާޅުވީ އެ މައްސަލައާ ގުޅިގެން ހަ ބިދޭސީން އިމިގްރޭޝަނާ ހަވާލު ކުރީ ރޭގެ ވަގުތެއްގައި ކަމަށެވެ. އިމިގްރޭޝަން ގާނޫނުގެ ދަށުން މި ހުރިހާ ބިދޭސީންގެ ވިސާ ބާތިލުކޮށް، ޑީޕޯޓުކުރުމަށް މިހާރު ނިންމާފައިވާ ކަމަށް އިމިގްރޭޝަނުން ވިދާޅުވިއެވެ.

އިމިގްރޭޝަނުން ވަނީ އެމީހުންގެ ފޮޓޯ އާއި އުމުރު ވެސް އާންމުކޮށްފައެވެ. އެ ހަ މީހުންގެ ތެރޭގައި ހިމެނެނީ އުމުރުން 26 އަހަރުގެ ފިރިހެނަކާއި 27 އަހަރުގެ ފިރިހެނަކާއި 29 އަހަރުގެ ދެ ފިރިހެނުންނާއި 38 އަހަރުގެ ފިރިހެނަކާއި 40 އަހަރުގެ ފިރިހެނެކެވެ.

ރާއްޖޭގައި މާރާމާރީ ހިންގައި އަދި މުޒާހަރާކުރާ ބިދޭސީންނާއި ރާއްޖޭގައި ގަވައިދާ ހިލާފަށް އުޅޭ ބިދޭސީން ޑީޕޯޓް ކުރުމަކީ ސަރުކާރުން މިހާރު އެންމެ އިސްކަމެއް ދީގެން ކުރަމުން އަންނަ ކަމެކެވެ.