އެމްއެމްއޭގެ ގަވަރުނަރުކަމަށް އަޙްމަދު މުނައްވަރު އައްޔަންކުރައްވައިފި

‎ އަލަށް އައްޔަންކުރެވުނު އެމްއެމްއޭގެ ގަވަރުނަރު

ރައީސް ޑރ. މުޙައްމަދު މުޢިއްޒު ވަނީ އަޙްމަދު މުނައްވަރު މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުކަމަށް އައްޔަންކުރައްވާފައެވެ. މި އައްޔަންކުރެއްވުން ވަނީ މޯލްޑިވްސް މަނިޓަރީ އޮތޯރިޓީގެ ޤާނޫނު 1981 ގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުންނެވެ.

އައްޔަންކުރެއްވި ލިޔުން ޙަވާލުކުރެއްވުމުގެ ރަސްމިއްޔާތު ބޭއްވުނީ އިއްޔެގެ ހެނދުނު ރައީސް އޮފީހުގައެވެ. ލިޔުން ޙަވާލުކުރެއްވުމަށްފަހު، ރައީސާއި އަލަށް އައްޔަންކުރެވުނު އެމްއެމްއޭގެ ގަވަރުނަރާ ބައްދަލުކުރައްވައި ޤައުމުގެ އިޤްތިޞާދީ ޙާލަތާ ބެހޭގޮތުން މަޝްވަރާކުރެއްވިއެވެ.

މި ބައްދަލުވުމުގައި ރައީސް ވަނީ އެހެން މާލީ މުއައްސަސާތަކާ ގުޅިގެން މަސައްކަތްކުރުމަށް ގަވަރުނަރަށް ހިތްވަރުދެއްވާފައެވެ. އަދި އަޙްމަދު މުނައްވަރު ވަނީ ޤައުމުގެ އިޤްތިޞާދު ކުރިއެރުވުމަށް ސަރުކާރުން ކުރައްވާ މަސައްކަތްތަކަށް ފުރިހަމަ އެއްބާރުލުން ދެއްވާނެކަމުގެ ޔަޤީންކަން އަރުވާފައެވެ.

އަޙްމަދު މުނައްވަރަކީ 12 ޑިސެމްބަރު 2023 އިން 22 ޖުލައި 2024 އަށް މިނިސްޓަރ އޮފް ފިނޭންސްގެ ލަފާދޭ ފަރާތެއްގެ ގޮތުގައި މަސައްކަތްކުރައްވާފައިވާ ބޭފުޅެކެވެ. މީގެ އިތުރުން އޭނާ ވަނީ ކުރިން މިނިސްޓަރ އޮފް ފިނޭންސްގެ މަޤާމުވެސް ފުރުއްވާފައެވެ.