ދަތި ވެގެން މިއުޅެނީ ކޮވިޑުން އެކަންޏެއް ނޫން، މިއީ ބޮޑެތި ޕްރޮޖެކްޓްތައް ނުނިމުމުގެ ނަތީޖާ: ޒަމީރު

ރާއްޖޭގެ މާލީ ހާލަތު މިހާ ގޯސްވެފައި މިވަނީ ދިމާވި ކޮވިޑް-19ގެ ހާލަތުން އެކަނި ނޫން ކަމަށާއި މިއީ ދަރަނި ނަގައިގެން ހިންގަން އުޅުނު ބޮޑެތި ޕްރޮޖެކްޓްތައް ނުނިމުމުގެ ނަތީޖާ ކަމަށް ހާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.

ޕީއެސްއެމް ރާއްޖެމިއަދު ޕްރޮގްރާމްގައި ވާހަކަދައްކަވަމުން ޒަމީރު ވިދާޅުވީ، ވެލާނާ އިންޓަރނޭޝަނަލް ޓާމިނަލް ބޮޑުކުރުން ފަދަ މަސައްކަތަކީ ބޮޑެތި ލޯނުތައް ނަގައިގެން ކުރުމަށް ރާވާފައިވާ ކަންތައްތަކަށް ވީ އިރު، ފަސް އަހަރުގެ ދައުރެއް ނިމިގެން ދިޔައިރު ހުޅުވުމަށް އަންދާޒާކޮށްފައިވާ ތާރީހަށް އެކަން ނުކުރެވުމުން ގައުމަށް ބޮޑެތި ގެއްލުންތައް ލިބިގެންދާ ކަމަށެވެ.

އެގޮތުން، އެފަދަ ޕްރޮޖެކްޓަކާއި އެކު ރާއްޖެއަށް އެތެރެވާނޭ ފަތުރުވެރިންގެ އަދަދު މިލިއަނުން އިތުރުވާނެކަމަށް އަންދާޒާކޮށް، ލިބޭ އާމްދަނީ އިތުރުވާނެ ކަމަށް ބެލެވުނު ނަމަވެސް އެކަން ނިންމާ ތާރީހު ފަހަނަޅައިގޮސް ދާއިރުވެސް އެކަން ކުރެވިފައި ނުވާ އޭނާ ވިދާޅުވިއެވެ. ޒަމީރު ވިދާޅުވީ، ޕްރޮޖެކްޓެއް ފަށައި އެއިން ފައިސާލިބި ފައިސާ އަނބުރާ ދައްކަން މުއްދަތެއް ލިބުނު ނަމަވެސް މުއްދަތު ފަހަނަޅައި ދާއިރު ޕްރޮޖެކްޓް ނުނިމުމުގެ ސަބަބުން ލިބޭ ގްރޭސް ޕީރިއެޑްގެވެސް ބޭނުން ނުހިފޭ ކަމަށެވެ. އެކަހަލަ ގިނަ ޕްރޮޖެކްޓެތަކެއް މިދިޔަ ފަސް އަހަރު ތެރޭ އެބަހުރި ކަމަށް ހާރިޖީ ވަޒީރު ފާހަގަކުރެއްވިއެވެ.

ޒަމީރު ވިދާޅުވީ މި އަހަރަކީ ތިން މިލިއަން ފަތުރުވެރިން އަންނާނެކަމަށް ބެލެވުނު އަހަރު ކަމަށާއި އެއާރޕޯޓު ޕްރޮޖެކްޓް ނުނިމުގެ ސަބަބުން އެކަމަށް އެއްވެސް ބަޔަކަށް "ޕުޝް" ނުކުރެވުނު ކަމަށެވެ.

މި ޕްރޮޖެކްޓް ނިންމުމަކީ ސަރުކާރުގެ ޒިންމާއެެއްކަން ފާހަގަ ކުރައްްވަމުން ޒަމީރު ވިދާޅުވީ ޗައިނާއާއި އެކު އެގްޒިމް ބޭންކުގެ 380 މިލިއަން ޑޮލަރުގެ ފައިސާ އަނބުރާ ދެއްކުން ލަސްކުރަން އެ ގައުމާއި އެކު މަޝްވަރާކުރެވިއްޖެ ކަމަށެވެ. ރައީސް ޑރ. މުހައްމަދު މުއިއްޒުގެ ސިޓީ ފުޅަށް ޗައިނާގެގެ ރައީސް ޝީ ޖިންގ ޕިންގެ ފެހި ސިގްނަލް ލިބި ޓެކްނިކަލް ގިނަ މަސައްކަތްތަކެއް ކުރައްވާ ކަމަށް އޭނާ ވިދާޅުވިއެވެ. ޒަމީރު ވިދާޅުވީ، ހިޔާ ފްލެޓްގެ ޕޭމަންޓްވެސް މިހާރު ދައްކަން ޖެހިއްޖެ ކަމަށާއި އެ މަޝްރޫއުގެ މަސައްކަތް ނިމި އެތައް ޒަމާނެއް ވަންދެން އިންފްރާސްޓްރަކްޗަރ އެ ސަރަހައްދުގައި ނުނިމި ހުރުމުގެ ސަބަބުން ދިމާވި ގިނަ މައްސަލަތައްވެސް ހުރި ކަމަށެވެ.