އިސްދޫ-ކަލައިދޫ އެއާޕޯޓަކީ އިސްދޫ ދާއިރާގެ ތަރައްގީއަށް އެޅޭ އެންމެ ބޮޑު ފިޔަވަޅުކަމަށް އެ ދާއިރާގެ މަޖިލިސް މެންބަރު އިސްމާއިލް ޝަފީއު ވިދާޅުވެއްޖެއެވެ.
މިއަދު އިންފްރާސްޓްރަކްޗާ މިނިސްޓްރީން ލ. އަތޮޅުގައި އަޅާ ދެވަނަ އެއާޕޯޓު އަޅާނީ އިސްދޫ-ކަލައިދޫގައިކަމަށް ނިންމުމުން ޝަފީއު ވިދާޅުވީ އެ އެޕޯޓަކީ މުޅި އަތޮޅާއި މުޅި ދާއިރާއަށް އިންގިލާބީ ކުރިއެރުން އަންނާނެކަމަށެވެ.
އެ އެއާޕޯޓަކީ އެ ދާއިރާގެ ރައްޔިތުން އެދި އެދި ތިބި އެއާޕޯޓެއްކަމަށާއި، އެ އެއާޕޯޓު އެ ދާއިރާގައި އަޅަން ނިންމުމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ޝުކުރު ދަންނަވާކަމަށް ވެސް ޝަފީއު ވިދާޅުވިއެވެ.
ލ. އަތޮޅުގައި ދެވަނަ އެއާޕޯޓެއް އެޅުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުފުފުޅެކެވެ.
ނަމަވެސް އެއާޕޯޓު އަޅާނެ ވަކި ރަށެއް އޭރު ރައީސް ނިންމަވައިފައިނުވެއެވެ.
ލ. އަތޮޅުގައި ވައިގެމަގުން ދަތުރުކުރުމަށް އޮންނަނީ ކައްދޫގައި އޮންނަ އެއާޕޯޓު އެކަންޏެވެ. އެ އެއާޕޯޓަށް އިސްދޫ ކަލައިދޫގެ ރައްޔިތުން ދަތުރުކުރާނަމަ 45 މިނެޓު ހޭދަވެއެވެ.
އެހެންކަމުން އިސްދޫ ކަލައިދޫގައި އެއާޕޯޓު އެޅުމުން އިސްދޫ ކަލައިދޫ ކައިރީގައި އޮންނަ ދަނބިދޫ އަދި މާބައިދޫ ރައްޔިތުންނަށް ދަތުރުފަތުރުކުރުމަށް ފަސޭހަވެގެންދާނެއެވެ.
ކޮމެންޓް